Ўз соҳасида катта муваффақиятга эришган тадбиркор ва эксперт аёллар қизлар билан учрашди
Ёшлар ижод саройида Ёшлар ишлари агентлиги ва “Қизлар академияси” билан ҳамкорликда "“QizlarFest” — 2026” фестивали бўлиб ўтди.
Бугунги кунда хотин-қизларнинг жамиятдаги ўрни, уларнинг таълим олиши ва касб-ҳунар эгаллаши давлат сиёсатининг энг муҳим йўналишларидан бирига айланди. Шу боис, мамлакатимизда қизларнинг салоҳиятини рўёбга чиқариш, уларни замонавий билимлар ва бизнес оламига йўналтиришга қаратилган қатор йирик лойиҳалар амалга оширилмоқда. Ана шундай эзгу ташаббуслардан бири у минглаб хотин-қизларни бирлаштирган “QizlarFest” фестивали бўлди.
Хотин-қизларни замонавий касблар, бизнес, соғломлаштириш, психологик ва ҳуқуқий йўналишларда қўллаб-қувватлаш ҳамда улар учун ўзаро тажриба алмашиш имконини яратиш мақсадида ташкил этилган тадбирда 5 мингдан зиёд иштирокчи қатнашди.
Фестиваль доирасида таклиф этилган спикерлар шахсий ривожланиш ва тадбиркорликка илк қадам мавзуларида маҳорат дарсларини ўтказиб, иштирокчилар билан ўз билим ва тажрибаларини бўлишди.
Шунингдек, “Қизлар академияси” жамоаси ва фестиваль ҳомийлари томонидан иштирокчиларга турли совғалар топширилди.
Тадбирда қайд этилганидек, бу ташаббуслар қизларнинг билим ва кўникмаларини ривожлантириш, янги имкониятларни кашф этиш ҳамда ўз салоҳиятини рўёбга чиқаришига хизмат қилди.
Гулноза Бобоева,ЎзА
