Осмонда икки кишилик "беш юлдузли" ётоқ…
"Singapore Airlines" узоқ масофали парвоз давомида йўловчига янада қулай шароит яратиш учун 1,6 миллиард доллар сарфлайди. Компания тарихидаги энг йирик янгилик доирасида биринчи ва бизнес тоифали ўриндиқлар алмаштирилади. Биринчи тоифада икки кишилик ётоққа айланадиган махсус жойлар ташкил этилади. Янги салонлар 2027 йил иккинчи ярмидан бошлаб фойдаланишга топширилади.
Мазкур лойиҳа асосида 72 самолёт қайта жиҳозланади. Биринчи тоифа йўловчилари учун кенгроқ шахсий ҳудуд ва икки кишилик ётоқ ўриндиғи, бизнес тоифасида эса ёпиладиган эшикли, тўлиқ ётиб дам олиш имконини берувчи жойлар яратилади. Янгилик “Airbus A350” самолётларига ҳам татбиқ этилади. Компания шу тариқа “Air France”, “British Airways” ва “United Airlines” каби рақибларининг қимматбаҳо саҳнларига муносиб муқобил таклиф тайёрлашни кўзлаган.
Янги ўриндиқларни жорий этиш самолёт ва қўшимча жиҳозларни сертификатлаш жараёнидаги кечикиш сабаб ортга сурилган. “Boeing 777-9” учоғининг фойдаланишга топширилиши бир неча йил кечикади. A350 учун янги ўриндиқни тасдиқлаш ҳам қийин кечяпти. Шу боис мутахассислар дастлаб фақат янги моделга мўлжалланган лойиҳани мавжуд ҳаво кемаларига татбиқ этишни ҳам ўйлаяпти.
Мусулмон Зиё, ЎзА
