ОЧЛ-2: «Насаф» бугун сафарда ўйнайди
Футбол бўйича Осиё чемпионлар лигаси-2 мусобақасида мамлакатимиз шарафини ҳимоя қилаётган «Насаф» клуби бугун гуруҳ босқичидаги илк учрашувини ўтказади.
Қаршининг «Насаф» жамоаси Осиё чемпионлар лигаси–2 мусобақасида «А» гуруҳидан жой олган. Унда клубимиз БААнинг «Ал-Ваҳда», Кувайтнинг «Ал-Кувайт» ва Баҳрайннинг «Ал-Ҳолдия» клублари билан куч синашади.
«Насаф» гуруҳ босқичидаги иштирокини бугун 16 сентябрь куни сафарда «Ал-Ҳолдия» клубига қарши баҳс билан бошлайди. Баҳрайнда ўтадиган учрашув Тошкент вақти билан соат 21:00 да старт олади. Учрашувда мезбонлар сариқ, «Насаф» футболчилари эса қизил рангли либосларда майдонга тушади.
Маълумот учун, Осиё чемпионлар лигаси-2 мусобақасининг гуруҳ босқичи 9 декабрга қадар давом этади. Унда жамоалар ўзаро уй ва сафар учрашувларида куч синашади. Ҳар бир гуруҳдан энг яхши икки жамоа кейинги босқичга йўл олади.
Жавоҳир Тошхўжаев, ЎзА
