Низами атындағы Өзбекстан ұлттық педагогикалық университетінің жаңа кампусы ашылды

Өзбекстан Республикасының Президенті Шавкат Мирзиёев пен Әзербайжан Республикасының Президенті Илхам Әлиев Жаңа Ташкентте Низами атындағы Өзбекстан ұлттық педагогикалық университетінің жаңа кампусының салтанатты ашылу рәсіміне қатысты.

Мемлекет басшылары Низами Гәнжауи ескерткішінің жанына ағаш отырғызды.

Президенттерге университет кешенінің құрылыс барысы, білім беру инфрақұрылымы және кампусты дамыту жоспарлары туралы ақпарат берілді.

40 гектар аумақта салынып жатқан кампус құрылысы екі кезеңмен жүзеге асырылуда. Мұнда жалпы саны 20 мың студентке арналған оқу ғимараттары мен 5 мың орындық студенттер жатақханаларын салу көзделген.

Бірінші кезең аясында 12 мың студентке арналған бес қабатты оқу ғимараты мен заманауи зертханалар кешені бой көтерді.

Мемлекет басшылары кампуста жасалған оқу және ғылыми ортамен, ақпараттық-ресурстық орталықпен, сондай-ақ Низами Гәнжауидің мұрасына арналған музей экспозициясымен танысты.

Музейде ұлы әзербайжан ақыны әрі ойшылы Низами Гәнжауидің өмірі мен шығармашылығы, оның бай рухани мұрасы, сондай-ақ Өзбекстан мен Әзербайжан халықтары арасындағы көпғасырлық мәдени және әдеби байланыстар көрініс тапқан.

Көшбасшылар білім, ғылым және мәдениет салаларындағы байланыстардың бауырлас екі халықты одан әрі жақындастыруда, жас ұрпақты ортақ рухани құндылықтар негізінде тәрбиелеуде маңызды рөл атқаратынын атап өтті.