“Навбаҳор” ўз уйига қайтишни ғалаба билан бошлади

Наманган шаҳрининг Давлатобод туманидаги “Марказий” стадион таъмирлаш ишларидан сўнг яна ўз эшикларини миллионлар ўйини ихлосмандлари учун очди. Минглаб мухлислар билан тўлиб-тошган замонавий аренада, Суперлиганинг 15-тури доирасида “Навбаҳор” жамоаси Урганчнинг “Хоразм” клубини қабул қилди.

Ўйин тафсилотларига тўхталадиган бўлсак, учрашув давомида устунликни қўлдан бой бермаган “Лочинлар” йирик – 5:1 ҳисобида зафар қучиб, мухлисларига шодлик улашди. Эътиборлиси шундаки, беллашувда воҳаликлар дарвозасига тўртта гол урган Ҳусайн Норчаев "покер"га эришиб, ўз номини “Навбаҳор” тарихига муҳрлади. Бу билан Наманганда 12 йиллик тарих қайта ёзилди.

Охирги бор наманганликлар сафида миллий чемпионатда бир ўйинда тўртта гол уриш кўрсаткичи 2014 йили қайд этилиб, ўшанда украиналик ҳужумчи Руслан Качур "Бухоро" клубига қарши кечган учрашувда (4:1) “покер” муаллифи бўлганди.

Ўйиндаги якунловчи голни миллий терма жамоамизнинг яна бир аъзоси Русланбек Жиянов киритди. "Хоразм" футболчилари эса, биринчи таймда ҳисобни қисқартирувчи тўпни кирита олишди, холос. Шу тариқа, катта устунлик билан муваффақият қозонган "Навбаҳор" очколари сонини 25 тага етказиб, мусобақа жадвалида 4-ўринга кўтарилди.

Дарҳақиқат, янгиланган “Марказий” стадионнинг қайта фаолият бошлашини Наманган футболи ҳаётидаги муҳим воқелик сифатида таъкидлаш жоиз. Боиси, мамлакат олий чемпионатининг доимий иштирокчиларидан бири – “Навбаҳор” қадрдон майдонига муносиб қайтиб, ишқибозларга ёрқин ғалаба онларини тақдим этди.

Таъкидланганидек, кейинги йилларда “Навбаҳор” таркибидан Ўзбекистон миллий терма жамоасига иқтидорли футболчилар етишиб чиққани, жумладан, яқинда ўтказилган 2026 йилги жаҳон чемпионатида дарвозабон Ўткир Юсупов ва ярим ҳимоячи Русланбек Жияновнинг иштирок этгани наманганлик футболчиларнинг салоҳиятини яна бир бор намоён этди.

Тадбир якунида “Навбаҳор” клубининг моддий-техника базасини мустаҳкамлаш ва футболчиларни ҳар томонлама қўллаб-қувватлаш ишлари изчил давом эттирилиши қайд этилди.

Маълумот ўрнида, Суперлиганинг кейинги 16-турида “Навбаҳор” футболчилари Термизда маҳаллий “Сурхон” клубига қарши майдонга тушади.

Оқилхон Дадабоев, ЎзА мухбири.