Наманганда ёш мерганлар беллашди
ФОТОРЕПОРТАЖ
Наманган шаҳрида Ўзбекистон Республикаси давлат мустақиллигининг 35 йиллигига бағишланган ёшлар ўртасида пневматик қуролдан ўқ отиш бўйича мусобақа бўлиб ўтди
“Ватанпарвар” ташкилоти Наманган шаҳар ўқув-спорт техника марказига қарашли ўқ отиш мажмуасида “Ягона Ватан, ягона халқ бўлиб, янги ҳаёт ва келажак яратамиз!” шиори остида ташкил этилган беллашувлар пневматик қуролдан ўқ отиш ва пара ўқ отиш бўйича Наманган вилояти чемпионатининг II босқичи доирасида ўтказилди. Унда шаҳар ва туман ўқув-спорт техника марказларидан 73 нафар ёш спортчи иштирок этиб, ВП-6 ва ПП-3 машқлари бўйича ҳаво милтиғи ҳамда ҳаво тўппончасидан ўқ отишда ўз маҳоратини намойиш этди.
[gallery-31110]
Мусобақада имконияти чекланган спортчилар ҳам фаол иштирок этиб, муносиб натижаларни қайд этди.
ПП-3 машқи бўйича Ирина Тарасова, Рефат Керимов, Алина Тарасова ва Вадим Кандикова, ВП-6 машқида эса Севиле Керимова, Ойбек Ғуломжонов, Дурдона Мавланова, Саидакбар Ёқубов ва Маҳлиё Муҳаммадалиева биринчи ўринни эгаллади.
Пара ўқ отиш бўйича ПП-3 машқида Дилдора Низомова, ВП-6 машқида Сарвиноз Ҳамидуллаева ва Муҳаммаджон Исматуллаев ғолибликни қўлга киритди.
Умумжамоа натижаларига кўра, Вилоят техник ва амалий турлари маркази жамоаси биринчи, 1-сонли Наманган шаҳар ЎСТМ жамоаси иккинчи, Тўрақўрғон туман ЎСТМ жамоаси учинчи ўринни эгаллади.
Мусобақа ғолиб ва совриндорларига “Ватанпарвар” ташкилотининг фахрий ёрлиқ ва медаллари тантанали равишда топширилди.
Ҳотам МАМАДАЛИЕВ(сурат),ЎзА
