Мурожаатларнинг 94,2 фоизи ижобий ҳал этилди
Сув хўжалиги вазирлиги ахборот хизмати раҳбари Шуҳрат Суюновнинг маълум қилишича, 2026 йилнинг биринчи ярим йиллигида вазирлик марказий аппаратига жисмоний ва юридик шахслардан жами 1 476 та мурожаат келиб тушган.
Бу ўтган йилнинг мос даврига нисбатан 824 тага кам. Маълумот учун, 2025 йилнинг биринчи ярим йиллигида вазирликка 2 300 та мурожаат келиб тушган.
Келиб тушган мурожаатлар Президентнинг Халқ қабулхоналари, Бош вазир ва Бош прокуратурага йўлланган аризалар, шунингдек, электрон хатлар, вазирликнинг ишонч телефони ва почта алоқаси орқали қабул қилинган.
Таҳлилларга кўра, мурожаатларнинг асосий қисми ирригация ва мелиорация ҳамда сувдан фойдаланиш масалаларига тўғри келган. Қолган мурожаатлар насос станциялари ва тик қудуқлар фаолияти, давлат-хусусий шериклик, капитал қурилиш, ижтимоий масалалар, инновацион технологияларни жорий этиш, ташкилотлар раҳбарлари фаолияти ҳамда инвестицияларни жалб этиш билан боғлиқ масалаларни қамраб олган.
Ҳудудлар кесимида энг кўп мурожаатлар Фарғона, Сурхондарё, Қашқадарё ва Наманган вилоятларидан келиб тушган.
Вазирлик ваколати доирасида кўриб чиқилган 1 231 та мурожаатнинг 1 160 таси, яъни 94,2 фоизи ижобий ҳал этилган. Қолган мурожаатлар бўйича ҳуқуқий тушунтиришлар берилган ёки тегишлилигига кўра бошқа давлат органларига юборилган. Қайд этилишича, мурожаатларни кўриб чиқишда қонунчиликда белгиланган муддатларга тўлиқ риоя қилинган.
Шуҳрат Суюновнинг таъкидлашича, вазирлик ҳамда унинг ҳудудий тизим ташкилотларида кеча-кундуз фаолият юритувчи Call-center марказлари ишлаб турибди. Фуқароларнинг муаммоларини тезкор ҳал этиш мақсадида уларни масъул мутахассисларга бевосита улаш амалиёти ҳам йўлга қўйилган.
Н.Зиёдуллаева, ЎзА
