Мурожаатдан амалий ечимлар сари
Тадбиркорликни ривожлантиришда ишбилармонларнинг муаммоларини ўз вақтида аниқлаш, уларга қонуний ечим топиш ва бюрократик тўсиқларни бартараф этиш муҳим аҳамиятга эга. Бу борада тадбиркорлар билан очиқ мулоқот ўтказиш, уларнинг мурожаатларини жойида ўрганиш ва амалий ёрдам кўрсатишга алоҳида эътибор қаратилмоқда.
Шу мақсадда Тошкент вилояти божхона бошқармаси бошлиғи И.Агзамходжаев томонидан тадбиркорлар иштирокида сайёр қабул ташкил этилди.
Унда 100 нафарга яқин жисмоний ва юридик шахслар иштирок этиб, тадбиркорлик фаолиятини юритиш ва кенгайтириш жараёнида дуч келаётган муаммолари, кредит олиш, молиявий хизматлар, банк амалиётлари, божхона расмийлаштируви ҳамда бошқа масалалар юзасидан мурожаат ва таклифларини билдирди.
Қабул давомида тадбиркорлик субъектлари томонидан кўтарилган масалаларнинг амалий ечимига алоҳида эътибор қаратилди. Жумладан, “SPEYS S” МЧЖ вакили корхона томонидан импорт қилинаётган лифтларни божхона расмийлаштирувидан ўтказишда ҳар бир партия учун алоҳида лаборатория хулосаси талаб этилиши сабабли жараён 2–3 кунга чўзилаётганини маълум қилди.
Мазкур мурожаат юзасидан корхона томонидан тақдим этилган божхона юк декларациялари ўрганилиб, жараённи соддалаштириш имкониятлари кўриб чиқилди. Айни пайтда хавфни бошқариш тизимидаги тегишли топшириқларни қайта кўриб чиқиш бўйича таклифлар тайёрланмоқда. Шу билан бирга, лаборатория хулосаларини тезкор тақдим этиш орқали тадбиркорга амалий кўмак кўрсатиш чоралари кўрилмоқда.
Яна бир мурожаат “POLIMER 111” МЧЖ фаолияти билан боғлиқ бўлди. Корхона томонидан Эрондан импорт қилинаётган полимер гранулаларининг келиб чиқиш сертификатини олишда юзага келаётган муаммолар баён этилди.
Ушбу масала бўйича тадбиркорга муаммони ҳал этишнинг бир нечта муқобил йўли тушунтирилди. Жумладан, божхона тўловларини амалга оширган ҳолда товарни эркин муомалага чиқариш ва белгиланган муддатда келиб чиқиш сертификатини тақдим этиш, товарни учинчи давлат орқали олиб кириш ёки Ўзбекистоннинг Эрондаги элчихонаси орқали амалий кўмак сўраш имкониятлари кўриб чиқилди.
Сайёр қабулда билдирилган барча мурожаатлар масъуллар томонидан атрофлича тингланиб, уларни ҳал этиш юзасидан тегишли чора-тадбирлар белгиланди. Қўшимча ўрганиш талаб этиладиган масалалар масъул раҳбар ва ташкилотларга бириктирилиб, ижроси назоратга олинди.
Таҳлилларга кўра, жорий йилнинг январь–сентябрь ойларида Тошкент вилояти божхона бошқармасига жисмоний ва юридик шахслардан жами 198 та мурожаат келиб тушган. Уларнинг 153 таси бўйича қонунчилик доирасида батафсил тушунтиришлар берилган бўлса, 45 та мурожаат қаноатлантирилган.
Бундай сайёр қабуллар тадбиркорларнинг муаммоларини бевосита ўрганиш, уларга қонунчилик талаблари асосида тушунтириш ва амалий ёрдам кўрсатиш, шунингдек, божхона органлари билан ишбилармонлар ўртасидаги ҳамкорликни мустаҳкамлашга хизмат қилади.
А.Мусаев,ЎзА
