Мулкдорларга Янги Тошкентдан уй-жой олиш шартлари тақдим этилмоқда
Тошкент шаҳрида амалга оширилаётган реновация жараёнлари доирасида кўчиб ўтиш ва уй-жой шароитини яхшилашни режалаштираётган аҳоли учун яна бир муҳим қулайлик ва кенг имкониятлар эшиги очилмоқда. Пойтахт ҳокимлиги ахборот хизматининг хабарига кўра, эндиликда фуқароларга Янги Тошкент ҳудудидан замонавий уй-жойлар ажратиш механизми жорий этилмоқда.
Ушбу янги ва самарали механизм Ўзбекистон Республикаси Президентининг 2026 йил 10 ноябрдаги тегишли Фармонида назарда тутилган бўлиб, у шаҳарсозлик жараёнларини янада такомиллаштириш ва аҳоли манфаатларини тўла таъминлашга қаратилган.
Мазкур ташаббуснинг асосий ўзига хослиги шундаки, Янги Тошкент ҳудудида мулкдорларга мавжуд хонадон майдонидан бошлаб, унинг 150 фоизигача бўлган ҳажмда уй-жой бериш кўзда тутилмоқда. Масалан, агар оиланинг амалдаги хонадони 50 квадрат метрни ташкил этса, вариантлардан бири сифатида майдони 75 квадрат метргача бўлган янги уй-жой таклиф этилиши мумкин.
Шунингдек, бошқа муқобил ечимлар ҳам мавжуд. Жумладан, 70 квадрат метр майдонга эга битта хонадон ўрнига оилага 105 квадрат метргача бўлган битта кенгроқ уй ёки иккита алоҳида хонадон (масалан, 45 ва 60 квадрат метр майдонли уйлар) таклиф қилиниши мумкин.
Мутахассисларнинг таъкидлашича, булар қатъий кафолатланган ёки мажбурий шартлар эмас, балки қулайлик яратишга қаратилган шартли мисоллардир. Ҳар бир ҳолат кўчмас мулкнинг ўзига хос хусусиятлари ҳамда мулкдорларнинг реал эҳтиёжларидан келиб чиққан ҳолда индивидуал тартибда кўриб чиқилади. Бунда таклифларни тайёрлаш жараёнига мустақил ташкилотлар жалб этилиб, хонадонлар майдони, сони ва бошқа барча шартлар томонларнинг ўзаро келишуви асосида ҳал этилади.
Албатта, бу борада фуқароларнинг танлов эркинлиги таъминланади. Айрим оилалар учун ўзлари ўрганган, қадрдон туманида қолиш муҳим бўлса, бошқалар учун замонавий талабларга жавоб берадиган кенгроқ уй-жойга эга бўлиш ҳамда жадал суръатларда ривожланаётган Янги Тошкентга кўчиб ўтиш мақбулроқ танлов ҳисобланади. Энг муҳими, эндиликда реновация доирасида ҳар бир оиланинг манфаатларини ҳисобга олган ҳолда энг мақбул ечимни топиш учун янги йўл очилмоқда.
Мазкур янги имкониятлар қаторида асосий ва ўзгармас тамойиллар ҳам ўз кучида қолади: мулкдорларнинг қонуний ҳуқуқларини сўзсиз ҳимоя қилиш, амалга оширилаётган барча жараёнларнинг шаффофлигини таъминлаш ва компенсация шартларини ўзаро келишиш шулар жумласидандир.
ЎзА