Мамлакат чемпионати баҳслари давом этмоқда
ФОТОРЕПОРТАЖ
Аввал хабар қилинганидек, пойтахтимиздаги “Республика келажак маркази” спорт мажмуасида қиличбозлик бўйича катталар ўртасида Ўзбекистон чемпионати қизғин паллага кирди.
Мусобақа Ўзбекистон қиличбозлик федерацияси томонидан янгича форматда, халқаро талаблар асосида ташкил этилмоқда. Ҳакамлар ҳайъати таркибига маҳаллий мутахассислар билан бирга халқаро даражадаги ҳакамлар ҳам жалб этилгани эътиборга молик.
[gallery-29236]
Кескин ва муросасиз кечган беллашувларда 89 нафар спортчи қиличбозликнинг рапира йўналишида якка тартибда ғолиблик учун кураш олиб борди.
Қизлар ўртасида Полина Волобуева (Тошкент) ғолиб бўлди. Мафтуна Давронова (Фарғона) иккинчи ўринни эгаллади. Учинчи ўрин Сабина Адашалиева ва Рада Қосимова (Тошкент) ўртасида тақсимланди.
Эркаклар ўртасида Даниил Кравцов (Тошкент) биринчи ўринни қўлга киритди. Радмир Семенеев (Андижон вилояти) иккинчи ўринни эгаллади. Учинчи ўрин Дониёр Саъдуллаев ва Улуғбек Усмонов (Тошкент)га насиб этди.
Мусобақа якунларига кўра, ғолиб ва совриндорлар турнир ҳомийлари томонидан пул мукофотлари билан тақдирланди.
Беллашувлар юқори савияда, динамик ва рақобатбардош муҳитда ўтказилиб, ҳудудларда қиличбозликнинг изчил ривожланаётгани, спортчиларнинг тайёргарлик даражаси юксак эканини яна бир бор тасдиқлади.
Мамлакат чемпионати баҳслари 8 майга қадар давом этади.
Муҳаммад АМИН(сурат),ЎзА
