Маҳаллий ишлаб чиқариш ва экспорт имкониятлари таҳлил қилинди
Олий Мажлис Қонунчилик палатаси депутати Руслан Джумамуратов Қорақалпоғистон Республикаси Нукус шаҳрида жойлашган йирик саноат корхоналарига ташриф буюриб, ишлаб чиқариш жараёнлари, амалга оширилаётган инвестиция лойиҳалари ҳамда экспорт салоҳияти билан яқиндан танишди.
Дастлаб депутат “NUKUS SSP TEXNOPARK” масъулияти чекланган жамияти фаолиятини кўздан кечирди. Корхонада харидорлар талабидан келиб чиқиб пахта ва аралаш (сунъий ҳамда пахта) толалардан ип-калава ишлаб чиқариш йўлга қўйилган.
Қиймати 641,5 миллиард сўмлик мазкур лойиҳа доирасида Германия, Туркия, Швейцария ва Ҳиндистондан замонавий технологик ускуналар олиб келиниб, ишлаб чиқаришга жорий этилган. Корхонада 130 та янги иш ўрни яратилган бўлиб, йиллик ишлаб чиқариш қуввати 18,3 минг тонна ип-калавани ташкил этади.
Бугунги кунда корхона маҳсулотлари Россия, Туркия, Польша, Афғонистон ва Сурия давлатларига экспорт қилинмоқда. 2026 йилнинг январь-июль ойларида 907 минг АҚШ доллари миқдорида экспорт амалга оширилган.
Шунингдек, депутат “QORAQALPOQ BASALTWOOL” масъулияти чекланган жамиятида ҳам бўлиб, базальт минералидан иссиқликни сақловчи замонавий қурилиш материаллари ишлаб чиқариш жараёни билан танишди.
Қиймати 691,8 миллиард сўмлик ушбу инвестиция лойиҳаси доирасида Италия, Туркия, Швейцария ва Германиядан келтирилган замонавий ускуналар ўрнатилган. Корхонада 300 та иш ўрни яратилган бўлиб, йиллик ишлаб чиқариш қуввати 50 минг тоннани ташкил этади.
Корхонада ишлаб чиқарилаётган маҳсулотларнинг асосий қисми экспортга йўналтирилган. Ҳозирги кунда маҳсулотлар Озарбайжон ва Қирғизистонга экспорт қилинмоқда. 2026 йилнинг январь-июль ойларида 109 минг АҚШ долларлик маҳсулот экспорт қилинган.
Ташриф давомида депутат ишлаб чиқаришни янада ривожлантириш, экспорт географиясини кенгайтириш, янги иш ўринларини яратиш ҳамда ҳудуднинг саноат салоҳиятини ошириш борасида амалга оширилаётган ишлар билан танишиб, корхона мутасаддилари билан истиқболдаги режалар юзасидан фикр алмашди.
Довуд Абибуллаев,
ЎзА мухбири
