Магнус Карлсен: “Нодирбек Абдусатторов билан машғулотлар мени реалликка қайтарди”
Халқаро шахмат федерацияси рейтингида етакчилик қилаётган собиқ жаҳон чемпиони Магнус Карлсен ўтган ҳафтанинг сўнгги кунларида UNICEF учун ташкил этилган хайрия тадбири давомида ўтказаётган машғулотлари ва кейинги мусобақалари ҳақида тўхталиб, фаолиятида Нодирбек Абдусатторовнинг қандай ўрин тутиши тўғрисида фикр билдирди.
Норвегиялик дунёнинг биринчи рақамли шахматчиси Нодирбек Абдусатторов билан машғулотлари, шахматдаги интуиция ва келгуси мусобақалар борасида гапириб, “жаҳоннинг энг яхши шахматчиларидан бири Абдусатторов билан ташкил этилган машғулотлар мени реалликка қайтарди”, дея таъкидлади.
Унинг айтишича, интернетда кўплаб блиц партияларни ўйнаш айрим салбий одатларни шакллантиради. Нодирбек билан машғулотлар эса бу жиҳатдан улардан кўра фойдалироқ.
Магнус Карлсен, шунингдек, жорий йил декабрь ойининг сўнгги кунларида рапид ва блиц бўйича Туркиянинг Истанбул шаҳрида ўтадиган жаҳон чемпионатида қатнашиши эҳтимоли йироқ эмаслигини, бироқ ҳозирча якуний қарор қабул қилмаганини айтиб ўтди.
Тўлқин Рўзиев,
ЎзА
