Лукашенко Беларусга хорижлик ишчиларни жалб қилишнинг тартибини тушунтирди
Беларусь президенти Александр Лукашенко мамлакатда ишчи кучи етишмовчилигини бартараф этиш учун чет эллик мутахассисларни таклиф қилиш шартлари ҳақида гапирди.
“БелТА” ахборот агентлиги хабар беришича, Беларусда меҳнат мигрантларини қабул қилишнинг аниқ тизими йўлга қўйилган бўлиб, унга кўра, дастлаб элчихона хорижлик номзодларнинг ишончлилигини текширади, сўнгра корхона раҳбарлари ўзларига зарур бўлган мутахассисларни мустақил равишда танлаб оладилар.
Беларусда айни пайтда ишчи кучига эҳтиёж жуда юқори бўлиб, кўпгина хорижий давлатлардан муҳожирлар келиб меҳнат қилмоқда.
Лукашенко хорижлик ишчиларни жалб қилиш жараёни Ички ишлар вазирлиги томонидан қатъий назорат қилинишини, ишчиларни таклиф қилган корхона раҳбарлари эса уларнинг хулқ-атвори ва фаолияти учун шахсан жавобгар бўлишини ҳамда мамлакатда қатъий тартиб сақланиши шартлигини алоҳида таъкидлади.
Ф.Яхшибоева, ЎзА
