Кубок пойтахтга кетди
Наманган шаҳар ўқув спорт техника марказида корд авиамодель спорти бўйича мамлакат кубогининг финал босқичи ўтказилди.
Ушбу мусобақада Наманган, Андижон, Фарғона, Бухоро, Самарқанд, Навоий ва Тошкент вилоятлари ҳамда Тошкент шаҳридан келган тўқсонга яқин спортчилар ғолиблик учун ўзаро куч синашди.
Ўзбекистон мудофаасига кўмаклашувчи «Ватанпарвар» ташкилоти ташкил этилганининг 35 йиллигига бағишланган мусобақа спортнинг техник ва амалий турларини ривожлантириш, ёшларнинг ушбу йўналишга бўлган қизиқишини ошириш ҳамда иқтидорли спортчиларни қўллаб-қувватлашга хизматт қилади.
Беллашувларда иштирокчилар кордли авиамоделларнинг фигурали учиш, ҳаво жанги, тезлик моделлари, ҳаво пойгаси ва нусха моделлари каби йўналишларда ўз маҳоратини кўрсатишди.
Мусобақа давомида спортчиларнинг техник тайёргарлиги, авиамоделларни бошқариш маҳорати, аниқлик ва тезкорлиги синовдан ўтди. Ҳар бир йўналишда иштирокчилар юқори натижалар ва ғолиблик учун интилди.
Якуний натижаларга кўра, умумжамоа ҳисобида Тошкент вилояти вакиллари биринчи ўринни эгаллаб, Ўзбекистон кубоги соҳиби бўлишди. Иккинчи ўрин Тошкент шаҳри жамоасига, учинчи ўрин эса Фарғона вилояти спортчиларига насиб қилди.
Мусобақа ғолиб-совриндорлари ташкилотчилар томонидан муносиб равишда тақдирланишди. Совринларни ўз эгаларига “Ватанпарвар” ташкилоти Наманган вилояти кенгаши раиси Аҳмаджон Аълохўжаев топширди.
Оқилхон Дадабоев, ЎзА мухбири
