Крикет: Азиз Михлиев Осиё спорт ташкилотида муҳим вазифага тайинланди
Сўнгги йилларда мамлакатимизда спортни ривожлантириш, Ўзбекистоннинг халқаро спорт дипломатиясидаги ўрнини мустаҳкамлашга алоҳида эътибор қаратилиши ортидан ўзига хос натижалар қайд этилмоқда.
Олимпия спорт турлари бўлган оғир атлетика, бокс, дзюдо, таэквондо, сув спорт турларининг халқаро ташкилотларида қисқа фурсатда 10 нафардан зиёд ўзбекистонлик мутахассислар фаолият юритиб келаётгани бунга ёрқин мисол.
Ана шу кенг имкониятлар ва давлатимиз томонидан спорт соҳасида олиб борилаётган изчил сиёсат туфайли Ўзбекистон крикет федерацияси ҳам қисқа муддатда халқаро интеграциянинг муҳим босқичига кўтарилди.
Куни кеча Осиё крикет кенгашининг навбатдаги ижроия қўмитаси йиғилишида Ўзбекистон крикет федерацияси раиси Азиз Михлиев Осиё крикет кенгашининг Инсон ресурслари ва ҳуқуқий масалалар қўмитаси вакили этиб сайланди.
Бу, юртимизда ривож топаётган крикет спорти учун навбатдаги муҳим институционал босқич бўлиб, мамлакатимизнинг Осиё спорт ҳамжамиятидаги иштироки ва нуфузи изчил мустаҳкамланиб бораётганини кўрсатмоқда.
Айтиш лозимки, Осиё крикет кенгашининг Инсон ресурслари ва ҳуқуқий масалалар қўмитасига Саудия Арабистони крикет федерацияси раиси, шаҳзода Сауд бин Мишъал ал Сауд раҳбарлик қилиб келмоқда.
Қўмита таркибидан овоз бериш ҳуқуқига эга Саудия Арабистони, Сингапур, Бутан, Эрон вакиллари қаторида энди Ўзбекистон крикет федерацияси раҳбари ҳам жой эгаллади.
Ўзбекистонлик мутахассиснинг нафақат қитъада, балки дунёда крикет спорт тури ривожида муҳим роль ўйнайдиган нуфузли қўмита таркибига киритилиши мамлакатимизнинг халқаро спорт ташкилотларидаги бошқарув ва ҳуқуқий жараёнларда бевосита иштирок этиш имкониятлари кенгайиб бораётганининг амалий ифодасидир.
Мамлакатимизда олимпия спорт тури крикетнинг ривожланаётганига кўп бўлгани йўқ. Бундан 3-4 йил муқаддам ташкил этилган Ўзбекистон крикет федерацияси қисқа фурсатда Осиё ва Халқаро крикет кенгаши аъзолигига қабул қилинди. Бугун эса ўзбекистонлик мутахассис Осиё крикет кенгашининг муҳим бошқарув қўмиталаридан бирида ўз фаолиятини бошлади.
Бу, Ўзбекистон спортининг Осиё ва жаҳон майдонидаги мавқеини янада мустаҳкамлаш йўлидаги навбатдаги амалий қадам бўлди.
Т.Рўзиев, ЎзА
