Коррупцияга қарши курашишда халқаро стандартларга мувофиқлик таъминланмоқда
“Иссиқлик электр станциялари” АЖ Коррупцияга қарши курашиш ва комплаенс бошқармаси бошлиғи Баҳодир Носирхўжаевнинг маълум қилишича, 2026 йилнинг биринчи ярим йиллиги давомида мазкур ташкилот тизимида коррупциявий омилларнинг олдини олиш ва комплаенс тизимини такомиллаштириш бўйича тизимли ишлар амалга оширилди.
Жумладан, жамият марказий аппарати ва барча филиаллари “CERT International” сертификатлаш органи томонидан аудитдан ўтказилди. Аудит натижаларига кўра, тизимнинг халқаро стандартлар талабларига мувофиқлигини тасдиқловчи ISO сертификатлари қўлга киритилди.
Шунингдек, коррупцияга қарши курашиш ва комплаенс тизимларини янада такомиллаштириш мақсадида 61 нафар ходим “Мувофиқлик комплаенс менежменти тизими” бўйича махсус ўқув курсларида таҳсил олиб, белгиланган тартибда сертификатланди.
–Бундан ташқари, 159 нафар масъул ходимимиз Бош прокуратуранинг “Коррупцияга қарши виртуал академияси” электрон платформасида ўқитилди. Коррупцияга қарши курашиш бўйича 28 та семинар-тренинг ва давра суҳбати, 12 та профилактик тадбир ўтказдик. Ходимлар билан очиқ мулоқот қилиш, уларнинг муаммоларини ўрганиш ва жойида ечим топиш мақсадида 6 та очиқ ва сайёр қабул ташкил этдик.
Мурожаатларга ҳам алоҳида эътибор қаратяпмиз. Онлайн алоқа каналлари орқали коррупциявий ҳолатлар бўйича 4 та мурожаат келиб тушди. Уларнинг барчаси ўрганилиб, мурожаат муаллифларига тегишли тушунтиришлар берилди. Шунингдек, 1 та ҳолат бўйича хизмат текшируви ўтказилиб, натижалари тегишли органларга тақдим этилди, – деди Б.Носирхўжаев.
Брифингда таъкидланганидек, келгусида коррупциявий хавфларни барвақт аниқлаш, профилактика чораларини кучайтириш ва комплаенс тизимини янада такомиллаштиришга алоҳида эътибор қаратилади.
Н.Зиёдуллаева,
ЎзА
