Кўрфаз ОАВ нигоҳида Ўзбекистон: 2026 йил май–июнь шарҳи
Саудия, БАА, Қатар ва бошқа араб давлатлари матбуоти Ўзбекистоннинг энергетика, футбол, савдо ва туризм соҳаларидаги ютуқларини эътироф этмоқда. Бу ҳамкорлик учун янги имконият очади.
Саудия Арабистони: Расмий ОАВ, хусусан “Saudi Press Agency” (SPA) давлат ахборот агентлиги ва йирик нашрлар 2026 йил июнь ойи бошида Ўзбекистондаги йирик энергетика лойиҳаларига тўхталган. Ушбу йирик давлат матбуоти юртимизда кичик қувватли АЭС қурилиши бошланиши, бу жараёнга Саудия сармояси киритилиши, “ACWA Power” компанияси яшил энергия лойиҳалари йўлга қўйилишининг стратегик аҳамиятини юқори баҳолаган.
Шунингдек, Подшоҳликнинг инглиз тилидаги бош нашри – “Arab News” газетаси ЖЧ-2026 арафасида Марказий Осиёдан биринчи марта йўлланма олган “Оқ бўрилар”нинг имконияти, бош мураббий Фабио Каннаваро қўл остидаги 40 нафар футболчидан иборат кенгайтирилган таркибнинг Тошкентдаги уч ҳафталик йиғинини алоҳида мақола сифатида чоп этди.
Бирлашган Араб Амирликлари: БАА расмий WAM (Emirates News Agency) ахборот агентлиги 2026 йил май ойи якунида ўзбек тўқимачилик ва енгил саноат компанияларининг ушбу давлат бозорига кириб бориши ҳамда етакчи амирлик брендлари билан имзоланаётган янги савдо шартномалари ҳақида махсус ҳисобот эълон қилди.
Бундан ташқари Амирликларнинг спорт нашрлари маҳаллий “Baniyas” клубида тўп сурадиган ўзбекистонлик ярим ҳимоячи Отабек Шукуровнинг Жаҳон чемпионатидаги иштирокига тўхталиб, Ўзбекистон таркибида “Манчестер Сити” ҳимоячиси Абдуқодир Ҳусанов каби юлдузлар борлиги, улар Амирликлар футбол мухлислари учун ҳам яхши таниш эканини ёзган.
Қатар: QNA (Qatar News Agency) давлат ахборот агентлиги ва “Al Jazeera” телеканали 2026 йил май ойида икки давлат ўртасида эришилган ҳарбий-техник келишув мавзусини кенг ёритган эди. Июнь ойига келиб эса араб спорт шарҳловчилари Ўзбекистоннинг “К” гуруҳида Колумбия, Португалия ва Конго ДР жамоалари билан куч синашишига эътибор қаратган. Шунингдек, Қатар ва Ўзбекистон футболидаги ёшлар академияси тизимини таққослаб, юртимизда ёшлар спортига самарали инвестиция киритилаётганига урғу берган.
Кувайт: KUNA агентлиги 2026 йил июнь ойи бошида Сеулдаги халқаро кўргазмада Ўзбекистоннинг туризм салоҳияти, хусусан Кўрфаз давлатларидан келаётган сайёҳлар учун яратилган визасиз режим каби қулайликлар ҳақида хабар берди.
Ўмон ва Баҳрайн давлат нашрлари Ўзбекистоннинг Марказий Осиёдаги транспорт-логистика занжирини диверсификация қилиш ва яшил сармоя бўйича ташаббуслари Яқин Шарқ учун жуда жозибадорлик касб этаётганини таъкидлаган.
Ф.Яхшибоева, ЎзА
