Конгода тўй маросими фожиа билан якунланди
Конго Демократик Республикаси пойтахти Киншаса шаҳрида жумадан шанбага ўтар кечаси ўтказилган тўй маросими фожиали якунланди.
Таъкидланишича, пойтахтдаги Триумф бульварида жойлашган “Панацея” тантаналар залида тўсатдан аланга чиқиб, меҳмонлар ўртасида кучли ваҳима юзага келган.
Маҳаллий расмийларнинг маълум қилишича, ҳодиса оқибатида 22 киши ҳалок бўлган. Шунингдек, кўпчилик турли даражадаги жароҳатлар билан шаҳарнинг Вижана, Маман Емо, Камп Коколо каби шифохоналарига шошилинч равишда ётқизилган.
Воқеа гувоҳларининг айтишича, залда ягона ва нисбатан тор чиқиш эшиги бўлгани боис, одамларнинг бир вақтнинг ўзида ташқарига чиқиб кетиши имконсиз бўлган. Тўйхонани тез фурсатда қоплаб олган қуюқ тутун ва юзага келган оммавий ваҳима талафотлар сони ортишига сабаб бўлган. Ҳозирда мутахассислар томонидан ёнғиннинг келиб чиқиш сабаблари аниқланмоқда.
Ф.Яхшибоева, ЎзА
