Китоб орқали келажак бунёд этилади
21 май — Кутубхоначилар куни
Китоб — инсоният тафаккурининг энг буюк кашфиёти бўлса, кутубхона эса ана шу билим ва маърифат хазинасини асраб келаётган муқаддас маскандир. Жамият тараққиёти, ёшлар маънавияти ва илм-фан ривожида кутубхоначиларнинг ўрни беқиёс. Улар нафақат китоб сақловчи, балки маърифат тарғиботчиси, илмга йўл кўрсатувчи инсонлардир.
Ўзбекистонда 21 май санаси Кутубхоначилар куни сифатида нишонланади. Ушбу сана китоб ва маърифат йўлида фидокорона меҳнат қилаётган минглаб соҳа ходимларига ҳурмат ва эътибор рамзи ҳисобланади.
Аслида кутубхоналар оддий китоб сақланадиган жой эмас. Ҳозирда кутубхоналар замонавий ахборот маркази, таълим ва илмий изланишлар масканига айланиб бормоқда. Электрон кутубхоналар, рақамли платформалар, аудио китоблар ва онлайн хизматлар китобхонлик маданиятини янги босқичга олиб чиқмоқда.
Кутубхоначи эса ана шу билим оламини китобхон билан боғлаб турувчи муҳим кўприкдир. Улар китоб танлашда ёрдам беради, изланувчиларга манбалар топиб беради, ёшларни мутолаага қизиқтиради ва маънавий муҳит шаклланишига ҳисса қўшади.
Айниқса, сўнгги йилларда Ўзбекистонда китобхонликни ривожлантириш, кутубхоналар фаолиятини модернизация қилиш ва аҳолига қулай шароитлар яратишга алоҳида эътибор қаратилмоқда. Янги авлод кутубхоналари, электрон каталоглар ва мобил кутубхона хизматлари бу соҳадаги ислоҳотларнинг амалий ифодаси бўлмоқда.
Маълумотларга кўра, Ўзбекистонда 15 мингга яқин кутубхона фаолият юритмоқда. Уларда 85 миллиондан ортиқ китоб ва журнал сақланади, 13 миллион нафардан ошиқ фойдаланувчи рўйхатдан ўтган.
Муҳайё Тошқораева,
ЎзА
