Каллас: йирик давлатлар ЕИ бирлигидан қўрқмоқда (+видео)
Россия, АҚШ ва Хитой Европанинг бўлинишидан манфаатдор. Бу ҳақда 17 май куни Европа Иттифоқининг ташқи ишлар ва хавфсизлик сиёсати бўйича олий вакили Кая Каллас маълум қилди, деб хабар берди DW нашри.
Олий вакилнинг сўзларидан Politico нашри ҳам иқтибос келтирган.
“Нега бу йирик давлатлар Европа Иттифоқини заифлаштиришни хоҳлайди? Чунки биз биргаликда улардан анча кучлимиз”, — деди у Таллинда бўлиб ўтган конференцияда.
“Шу боис ҳам улар Европа Иттифоқини ёқтирмайди”, — дея қўшимча қилди Каллас.
Унинг таъкидлашича, Хитой ҳам, Россия ҳам Европа Иттифоқини айнан унинг бирлиги ва қудрати сабаб хушламайди.
“Агар биз бирдам бўлсак, агар биргаликда ҳаракат қилсак, улар билан тенг қудратга эга бўламиз, кучли бўламиз”, — деди ЕИ вакили.
Калласнинг фикрича, уларнинг алоҳида давлатлар билан ишлаши анча осон, чунки улар ягона блок сифатида ҳаракат қиладиган Европа Иттифоқидан кўра кичикроқ ва таъсир доираси торроқ.
У, шунингдек, “сизлар билан муносабатларимиз яхши, аммо Европа Иттифоқини ёқтирмаймиз” қабилидаги баёнотлар АҚШнинг “бўлиб ташла ва ҳукмронлик қил” стратегиясининг бир қисми эканини айтди.
Кая Каллас Европа Иттифоқига аъзо давлатларни Вашингтон билан икки томонлама келишувлар орқали иттифоқ бирлигини заифлаштирмасликка чақирди.
“Мен жуда хавотирдаман, чунки баъзи давлатлар айнан шу йўлдан кетаётганини кўряпман”, — деди у.
Politico нашрининг ёзишича, Дональд Трампнинг иккинчи президентлик муддати бошланганидан кейин айрим Европа давлатлари Вашингтон билан блокдан ташқари алоҳида алоқаларни сақлаб қолишга интилган.
Жумладан, Италия бош вазири Жоржа Мелони Европа билан АҚШ ўртасида воситачи бўлишга уринган, аммо Трампнинг Рим папасини танқид қилганидан кейин бу стратегия муваффақиятсиз тугаган.
<iframe width="650" height="420" src="https://www.youtube.com/embed/P6MYlOAjw6M" title="Kallas: yirik davlatlar YEI birligidanqo‘rqmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
