Жавоҳир Синдоров: "Жаҳон чемпионати ўйинлари ҳеч кимга осон бўлмайди"
АҚШнинг Сент-Луис шаҳрида “Grand Chess Tour” сериясининг навбатдаги босқичи “Saint Louis Rapid & Blitz 2026” халқаро турнири якунлангандан сўнг ҳамюртимиз Жавоҳир Синдоров жорий йилнинг 25 ноябрь-15 декабрь кунлари Швейцариянинг Женева шаҳрида ҳиндистонлик Гукеш Доммараджу билан Жаҳон шахмат тожи учун бўладиган мусобақа, тайёргарлик жараёнларининг бориши, қайси йўналишларга эътибор қаратаётганлиги хусусида журналистларга сўзлаб берди.
“Йил бошидан бери ўтказиб келинаётган турнирларда Гукеш жуда яхши ўйин намойиш этиб келмоқда. Бироқ, фикримча, у яхши, ҳатто ютуқли позицияга эга бўлган вазиятда ҳам баъзида мувозанатни йўқотиб қўяди. Айрим ҳолларда эса қийин, мағлубиятли ҳолатни ғалабага айлантира олиш хислати бор. Унинг партияларини кўрсангиз, ҳақиқатан ҳам жуда яхши ўйин амалиётига эгалиги, вазиятни чуқур таҳлил қилиши яққол кўриниб туради”, дея таъкидлаган Синдоров.
Шунингдек, Жавоҳир рақибининг ушбу ўйин услуби ҳақида тўхталиб, “мен бунга унчалик эътибор бермайман. У жуда кучли шахматчи эканини биламан. Унга қарши кўплаб мусобақаларда дона сурганимда буни бир неча бор ҳис қилганман. Албатта, Гукешнинг энг кучли позицион, чуқур таҳлилларга асосланган услубларига қарши ўз ўйин тактикамни ишлаб чиқиш йўлида тайёрланаман. Жаҳон чемпионати ўйинлари ҳеч кимга осон бўлмайди. У ердаги доимий руҳий босим, мусобақалар жараёнлари кўплаб қийинчиликларни келтириб чиқариши табиий. Гукеш ўзининг энг юқори формасида Женевага келишига ишонаман." дея фикр билдирган.
Т.Рўзиев ёзиб олди, ЎзА
