“Жаҳон чемпионати – 2026”: “H” гуруҳида тўрт қитъа вакиллари тўқнашади
Футбол мухлислари интиқлик билан кутаётган Жаҳон чемпионати бошланишига ҳам 10 кун қолмоқда. АҚШ, Канада ва Мексика мезбонлигида ўтадиган нуфузли турнир арафасида дунёнинг 48 та терма жамоаси қандай қилиб финал босқичи йўлланмасини қўлга киритганини ёдга оляпмиз.
Шу кунга қадар 8 та гуруҳдан ўрин олган терма жамоаларнинг Жаҳон чемпионатига чиқиши тарихи ҳақида тўхталган эдик. Бугун эса эътиборимиз “H” гуруҳи иштирокчилари — Испания, Кабо-Верде, Саудия Арабистони, Уругвай терма жамоаларига қаратилди.
“H” гуруҳининг фаворитларидан бири ҳисобланган Испания терма жамоаси Европа саралаш босқичида “E” гуруҳида иштирок этиб, 6 ўйинда 5 ғалаба ва 1 дуранг қайд этган ҳолда мундиалга йўл олди. Ушбу жамоа Жаҳон чемпионатларида 17-марта иштирок этади. Тарихий жиҳатдан эса Испания терма жамоаси фақатгина 2010 йилда мундиал ғолибига айланган. Шунингдек, жамоа 1978 йилдан бери ўтган барча Жаҳон чемпионатларида мунтазам иштирок этмоқда.
Уругвай ушбу гуруҳнинг яна бир кучли терма жамоаси сифатида эътироф этилмоқда. Бу жамоа Жанубий Америка минтақасидаги энг кучли 10 та жамоа иштирок этган саралашда 28 очко тўплаб, 4-ўринни эгаллади ва тўғридан-тўғри Жаҳон чемпионати йўлланмасини қўлга киритди. Бу гуруҳда рақобат ўта кескин кечди: Аргентина 38 очко билан биринчи, Эквадор эса 29 очко билан иккинчи ўринни эгаллади. Шунингдек, Колумбия, Уругвай ва Бразилия ҳамда Парагвай билан бир хил — 28 очкодан тўплаб, кейинги ўринларни эгаллади. Бу эса саралаш босқичининг нақадар мураккаб ва рақобатбардош бўлганини яққол кўрсатади.
Уругвай терма жамоаси бу сафар 14-маротаба мундиалда иштирок этади. Дарвоқе, бу жамоа ҳисобида дунё биринчилигининг иккита олтин медали мавжуд.
Кабо-Верде терма жамоаси Африка қитъасидаги саралаш босқичининг “D” гуруҳида 10 та ўйин ўтказиб, 7 ғалаба, 2 дуранг ва 1 мағлубият билан 23 очко тўплади ҳамда мундиал йўлланмасини ўз тарихида илк маротаба қўлга киритди.
Саудия Арабистони терма жамоаси эса Осиё минтақавий саралаш босқичининг иккинчи босқичида “G” гуруҳида 13 очко тўплаб, учинчи раундга йўл олди. У ерда эса ҳал қилувчи баҳсларда унчалик муваффақиятли иштирок эта олмади ва “С” гуруҳда 13 очко билан 3-ўринда қолди ва мундиал учун курашни тўртинчи босқичда давом эттирадиган бўлди. Унда саудиялик футболчилар Ироқ ва Индонезия термалари билан рақобатлашиб, 4 очко жамғарган ҳолда “ЖЧ-2026” иштирокчисига айланди. Саудия Арабистони терма жамоаси учун бу галги чемпионат олтинчиси ҳисобланади. Бу жамоа 2034 йилги мундиал мезбони сифатида эътироф этилган.
Мазкур гуруҳ учрашувлари 15–26 июнь кунлари ўтказилади:
15 июнь:
Испания — Кабо-Верде (Mercedes-Benz Stadium, Атланта)
Саудия Арабистони — Уругвай (Hard Rock Stadium, Майами-Гарденс)
21 июнь:
Испания — Саудия Арабистони (Mercedes-Benz Stadium, Атланта)
Уругвай — Кабо-Верде (Hard Rock Stadium, Майами-Гарденс)
26 июнь:
Кабо-Верде — Саудия Арабистони (NRG Stadium, Хьюстон)
Уругвай — Испания (Akron Stadium, Сапопан)
Жавоҳир Тошхўжаев,
ЎзА
