“Жаҳон чемпионати-2026”: “А” гуруҳида ким фаворит?

Футбол бўйича жорий йилги жаҳон чемпионати АҚШ, Канада ва Мексикада ўтказилиб, унда дунёнинг 48 та терма жамоаси 12 та гуруҳга бўлинган ҳолда бош соврин учун баҳс олиб боради.

Мундиал арафасида ҳар бир гуруҳдан ўрин олган терма жамоаларнинг жаҳон чемпионатигача босиб ўтган йўлига назар ташлаймиз. Кечаги мақоламизда Ўзбекистон миллий терма жамоаси иштирок этадиган “К” гуруҳи ҳақида маълумот берган эдик. Бугун эса “А” гуруҳидан жой олган жамоаларнинг саралаш босқичидаги иштироки ҳақида тўхталиб ўтамиз.

“ЖЧ-2026” мусобақасининг “А” гуруҳидан Мексика, Жанубий Африка Республикаси, Корея Республикаси ҳамда Чехия терма жамоалари ўрин олган. Ушбу квартет иштирокидаги баҳслар 11–24 июнь кунлари бўлиб ўтади.

Гуруҳ фаворитларидан бири сифатида қаралаётган Чехия терма жамоаси Европа саралаш босқичининг “L” гуруҳида 16 очко жамғариб, иккинчи ўринни эгаллади ва плей-офф йўлланмасини қўлга киритди. Чехлар ярим финалда Ирландияга қарши кечган баҳснинг асосий вақтида 2:2 ҳисобида дуранг ўйнаб, пенальтилар сериясида 4:3 ҳисобида устун келди. Финалда эса Дания билан кечган беллашувнинг асосий вақти яна 2:2 ҳисобида якунланди. Пенальтилар сериясида 3:1 ҳисобида ғалаба қозонган чехлар мундиалга йўл олди.

Корея Республикаси терма жамоаси Жаҳон чемпионати учун курашни Осиё минтақасидаги иккинчи саралаш босқичидан бошлади. Жамоа “С” гуруҳида 16 очко тўплаб, кейинги босқичга чиқди. Учинчи саралаш босқичида эса 22 очко жамғарган корейслар “B” гуруҳида биринчи ўринни эгаллаб, тўғридан-тўғри мундиал йўлланмасини расмийлаштирди.

Жанубий Африка Республикаси терма жамоаси Африка қитъасидаги саралаш баҳсларининг “С” гуруҳида 18 очко тўплаб, биринчи поғона орқали Жаҳон чемпионатига чиқиш имкониятини қўлга киритди.Мексика эса мусобақа мезбонларидан бири сифатида мундиалда тўғридан-тўғри иштирок этади. Айни пайтда мексикаликлар Европа ва Америка қитъасининг қатор кучли терма жамоаларига қарши ўртоқлик учрашувларида майдонга тушмоқда.

Маълумот учун, Мексика терма жамоаси Жаҳон чемпионатларида 18-маротаба иштирок этаётган бўлса, Корея Республикаси 12, Жанубий Африка Республикаси 4-марта мундиалда қатнашади. Чехия эса мустақил давлат сифатида иккинчи бор Жаҳон чемпионатида иштирок этади. Аввалроқ Чехословакия номи остида жамоа 8 бор мундиалда қатнашган.

“А” гуруҳидаги учрашувлар санаси ва майдонлар билан танишинг:

11 июнь
Мексика — Жанубий Африка Республикаси
Стадион: Ацтека

11 июнь
Корея Республикаси — Чехия
Стадион: Акрон

18 июнь
Чехия — Жанубий Африка Республикаси
Стадион: Мерседес-Бенц

18 июнь
Мексика — Корея Республикаси
Стадион: Акрон

24 июнь
Чехия — Мексика
Стадион: Ацтека

24 июнь
Жанубий Африка Республикаси — Корея Республикаси
Стадион: ББВА

Жавоҳир Тошхўжаев,
ЎзА