Исроилликларнинг ярмидан кўпи чет элда фуқаролигини ошкор қилишда эҳтиёткорлик қиляпти
“The Jerusalem Post” газетаси Яҳудийлар таъсири маркази томонидан август ойида ўтказилган сўров натижасига таяниб ёзишича, исроилликларнинг ярмидан кўпи 2023-йил 7 октябрдан кейин чет элга саёҳат қилганда фуқаролигини ошкор қилишдан эҳтиёт бўляпти.
Тадқиқотга кўра, сўровда қатнашганларнинг 52 фоизи чет элда фуқаролигини ошкор қилишдан бироз эҳтиёт бўлган, 41 фоизи 7 октябрдан кейин саёҳат ҳатти-ҳаракатини ўзгартирган, жумладан йўналиш танлаш, саёҳатни бекор қилиш ёки муайян фаолиятдан қочиш ҳақида хабар берган.
Бу хавотир антисемитизм, Исроилга қарши кайфият кучайиши, бир неча мамлакат билан муносабат ёмонлашиши туфайли келиб чиққан.
Бу галги сўров Исроил жамоатчилик дипломатияси самарадорлигига боғлиқ жиддий хавотирни ҳам очиб берди. Респондентларнинг 64 фоизи Исроил ва Қўшма Штатлар ўртасидаги стратегик муносабатни яхши баҳолаган. Сўралганларнинг атиги 23 фоизи Исроил ўз сиёсати ва позициясини халқаро аудиторияга самарали етказади, деб ҳисоблайди. 70 фоиз иштирокчи Исроил жамоатчилик дипломатиясини самарасиз дея баҳолаган.
С.Раҳимов, ЎзА
