Интеллектуал мулкни иқтисодий фаолликка жалб этиш масалалари муҳокама қилинди
Бугунги кунда интеллектуал мулкни ҳуқуқий ҳимоя қилиш, уни иқтисодий тараққиётнинг муҳим омилига айлантириш ҳамда инновацион тадбиркорликни қўллаб-қувватлаш борасидаги халқаро ҳамкорлик тобора кенгайиб бормоқда.
Швейцариянинг Женева шаҳрида ўтаётган Бутунжаҳон интеллектуал мулк ташкилоти (БИМТ) Ассамблеяларининг 68 - серияси доирасида Ўзбекистон Республикаси адлия вазири ўринбосари – интеллектуал мулк масалалари бўйича миллий орган раҳбари Музраф Икрамов ҳамда БИМТнинг Бизнес учун интеллектуал мулк бўлими директори Гай Пессах ўртасида икки томонлама учрашув бўлиб ўтди.
Мулоқот давомида Ўзбекистонда интеллектуал мулк обектларини тижоратлаштириш, кичик ва ўрта бизнесни қўллаб-қувватлаш ҳамда ушбу йўналишдаги ҳамкорликни янада ривожлантириш масалалари муҳокама қилинди, дейилади Адлия вазирлиги маълумотида.
Учрашувда 2026 йил март ойида Самарқанд ва Бухоро вилоятларида БИМТ, TÜRKPATENT ҳамда INTA ҳамкорлигида амалга оширилган “100 янги бренд” лойиҳаси натижалари ҳам юқори баҳоланди. Қайд этилишича, лойиҳа доирасида юзлаб тадбиркорлар халқаро экспертлардан амалий тавсиялар олди.
БИМТнинг Бизнес учун интеллектуал мулк бўлими директори Гай Пессах Ўзбекистонда интеллектуал мулк соҳасида амалга оширилаётган ислоҳотлар, жумладан, интеллектуал мулк обектларини иқтисодий фаолликка жалб этиш, тадбиркорликни қўллаб-қувватлаш ва миллий брендларни ривожлантириш борасидаги ишларни юксак баҳолади.
Шунингдек, томонлар Ўзбекистонда IP Management Clinic дастурини жорий этиш, кичик ва ўрта бизнес субектлари учун интеллектуал мулкни бошқариш стратегияларини ишлаб чиқиш ҳамда IP Business Center лойиҳасини амалга ошириш истиқболларини муҳокама қилди.
Учрашув якунида томонлар интеллектуал мулк объектларини тижоратлаштириш, бизнес учун замонавий қўллаб-қувватлаш инфратузилмасини яратиш ҳамда қўшма лойиҳаларни амалга ошириш бўйича ҳамкорликни янада фаоллаштиришга тайёр эканини тасдиқлади.
М.Ҳожиакбарова, ЎзА
