Интеллектуал мулк соҳасини ривожлантиришга ҳисса қўшганлар кўкрак нишони билан тақдирланади
Интеллектуал мулк соҳасига қўшган ҳисса энди эътиборсиз қолмайди. Ҳукумат қарори билан бу йўналишдаги хизматларни қадрловчи янги кўкрак нишони таъсис этилди. Унинг илк соҳиблари кимлар бўлади?
Ҳукуматнинг тегишли қарори билан “Интеллектуал мулк соҳасини ривожлантиришга қўшган ҳиссаси учун” кўкрак нишони тўғрисида низом тасдиқланди.
2026 йил 5 сентябрда қабул қилинган низомга кўра, кўкрак нишони билан мамлакатимизда интеллектуал мулк соҳасини ривожлантиришга муносиб ҳисса қўшган давлат ташкилотлари ва нодавлат ташкилотлар ходимлари, халқаро ташкилотлар вакиллари ҳамда тадбиркорлик субъектлари тақдирланади.
Кўкрак нишони билан тақдирлашга оид таклифларни кўриб чиқиш Комиссияси ташкил этилади.
Комиссия томонидан номзодларни кўкрак нишони билан тақдирлашда қуйидагилар инобатга олинади:
Интеллектуал мулк соҳасини ривожлантириш бўйича давлат дастурларини, норматив-ҳуқуқий ҳужжатлар лойиҳаларини ишлаб чиқишда иштирок этганлиги;
Интеллектуал мулк объектлари яратилишини қўллаб-қувватлаш борасидаги фаолияти;
Интеллектуал мулк объектларининг ҳуқуқий ҳимоясини таъминлашда фаол иштирок этганлиги;
Жамиятда интеллектуал фаолият натижаларига ҳурмат ҳиссини шакллантиришга қўшган ҳиссаси;
Интеллектуал мулк соҳасида халқаро ҳамкорликни ривожлантиришда, шу жумладан, интеллектуал мулк соҳасида амалга оширилаётган ислоҳотлар тўғрисида халқаро ҳамжамиятни хабардор қилишда иштирок этганлиги.
Кўкрак нишони ҳар йили 26 апрель – Халқаро интеллектуал мулк куни арафасида тантанали равишда топширилади.
Кўкрак нишони билан тақдирланган шахсларга БҲМнинг 4 баравари миқдорида бир йўла тўланадиган пул мукофоти берилади.
Шербек Исломов, ЎзА
