Ҳудуднинг стратегик ривожланиш масалаларига бағишланган йиғилиш бўлиб ўтди
Ҳар қандай ҳудуднинг келажаги тасодифан шаклланмайди. У аниқ мақсад, пухта ҳисоб-китоб, мавжуд имкониятни тўғри баҳолаш ва энг муҳими, белгиланган вазифалар ижросини қатъий назорат қилиш орқали барпо этилади.
Бугун Бухорода ҳам тараққиётга ана шундай ёндашув асосида қаралмоқда. Вилоятнинг эртанги қиёфаси, иқтисодий салоҳияти, инфратузилмаси, аҳоли фаровонлиги ва ҳудудлар имкониятларидан самарали фойдаланиш масалалари бугунданоқ аниқ режалар асосида белгилаб олинмоқда. Шу мақсадда Бухоро вилоятида ҳудуднинг стратегик ривожланиши, белгиланган мақсад ва кўрсаткичларнинг ижросини таъминлаш масалаларига бағишланган муҳим учрашув бўлиб ўтди. Унда Бухоро вилояти ҳокимининг биринчи ўринбосари Жамшид Шаропов, Ўзбекистон Республикаси Президенти ҳузуридаги Стратегик ривожланиш ва ислоҳотлар агентлиги директорининг ўринбосари Тоҳиржон Сафаров ҳамда тегишли ташкилотлар вакиллари иштирок этишди.
Давлат раҳбари ташаббуси билан мамлакатимизда стратегик режалаштириш ва бошқарувда янги ёндашувлар жорий этилмоқда. 2026 йил 16 февралдаги Фармон билан “Ўзбекистон — 2030” стратегияси янги шароитлар ва глобал ўзгаришлардан келиб чиқиб янгиланди. Ҳужжатда “мақсад — ҳаракат — натижа” тамойилига асосланган стратегик режалаштириш тизимини кучайтириш, натижадорлик кўрсаткичларини аниқ белгилаш ҳамда улар ижросини рақамлаштирилган мониторинг қилишга алоҳида эътибор қаратилган. Бу ёндашувнинг мазмуни жуда оддий, аммо талаби ниҳоятда катта: режа аниқ бўлади, масъул белгиланади, натижа ўлчанади ва ижро мунтазам таҳлил қилинади. Шу нуқтаи назардан, Бухорода ўтказилган йиғилиш ҳам шунчаки навбатдаги йиғилиш эмас, балки ҳудуд тараққиётига узоқ муддатли нигоҳ билан ёндашиш, бугунги имкониятларни эртанги натижалар билан боғлашга қаратилган мулоқот бўлди.
Мулоқот давомида вилоятни ижтимоий-иқтисодий жиҳатдан янада ривожлантириш, мавжуд табиий, иқтисодий, меҳнат ва инфратузилма салоҳиятидан оқилона фойдаланиш масалаларига алоҳида эътибор қаратилди. Зеро, Бухоронинг ҳар бир тумани ва шаҳрининг ўзига хос имкониятлари бор. Қайсидир ҳудудда саноат учун имконият катта бўлса, бошқасида қишлоқ хўжалиги, туризм, хизмат кўрсатиш ёки инвестиция салоҳияти юқори. Демак, барча ҳудудга бир хил ёндашув эмас, балки унинг ўзига хос жиҳатларини ҳисобга олган ҳолда ривожлантириш стратегиясини ишлаб чиқиш талаб этилади.
“Ўзбекистон — 2030” стратегиясида ҳам ҳудудларни комплекс ривожлантириш, урбанизация жараёнларини самарали ташкил этиш ва аҳоли учун муносиб шароитлар яратиш каби вазифалар белгиланган. Шу боис Бухоронинг стратегик режалари ҳам қуруқ рақамлар йиғиндиси эмас, балки одамлар ҳаётидаги реал ўзгаришларга хизмат қилиши лозим.
Стратегик кўрсаткичлар ҳақида гап кетганда баъзан рақамлар оддий статистикадек туюлади. Аслида эса ҳар бир рақам ортида инсон бор. Яратилган янги иш ўрни — ишсиз фуқаронинг даромади. Қурилган мактаб — фарзанднинг таълими. Яхшиланган йўл — аҳолининг эркин ҳаракати. Янги тиббий муассаса — инсон саломатлиги. Ташкил этилган корхона — ўнлаб оилаларнинг фаровонлиги. Шу маънода стратегиянинг ҳақиқий натижаси унинг саҳифаларда қанчалик чиройли ёзилганида эмас, балки одамлар ҳаётида қанчалик сезилаётганида намоён бўлади.
Учрашувда белгиланган вазифалар ижросини мунтазам таҳлил қилиш, мавжуд муаммоларни ўз вақтида аниқлаш ва улар бўйича тезкор чоралар кўриш масалалари ҳам муҳокама қилинди. Бу жуда муҳим. Чунки муаммони яшириш ёки унинг оқибатини кутиш эмас, балки уни илк босқичида аниқлаш ва ечимини излаш самарали бошқарувнинг муҳим шартидир. Шу боис ҳар бир кўрсаткич бўйича натижани мунтазам кузатиш, орқада қолаётган йўналишларни аниқлаш ва масъулларнинг амалий чораларини белгилаш талаб этилади. Учрашувнинг яна бир эътиборли жиҳати — Стратегик ривожланиш ва ислоҳотлар агентлиги томонидан ишлаб чиқилган “Geoportal” тизими имкониятларининг намойиш этилгани бўлди. Мазкур тизим орқали ҳудуддаги ижтимоий ва коммунал объектлар, инфратузилма, мавжуд ресурслар ҳамда уларга оид маълумотларни ягона платформада жамлаш ва тизимли акс эттириш имкони яратилади.
Бу нима дегани? Бу — ҳудудни бошқаришда маълумотга асосланган қарорлар қабул қилиш дегани. Қайси ҳудудда қандай объект бор? Қайси инфратузилмага эҳтиёж юқори? Қайси манзилда муаммо мавжуд? Қайси ҳудудга инвестиция киритиш мақсадга мувофиқ? Қайси лойиҳа аҳолига кўпроқ манфаат келтиради? Бундай саволларга рақамли маълумотлар асосида жавоб топиш имкони кенгаяди. Демак, замонавий технология энди фақат қулайлик яратиш воситаси эмас, балки ҳудудни режалаштириш, таҳлил қилиш ва келажакни белгилашнинг муҳим бошқарув инструментига айланмоқда.
Учрашув якунида муҳокама қилинган масалалар юзасидан масъулларга аниқ вазифалар белгилаб берилди. “Ўзбекистон — 2030” стратегияси доирасида белгиланган кўрсаткичларга эришиш, стратегик ҳужжатлар ижросини таъминлаш, амалга оширилаётган ишларни мунтазам мониторинг қилиб бориш бўйича топшириқлар берилди. Бу вазифаларнинг моҳияти бир нуқтада мужассам: натижа бўлиши керак. Чунки тараққиётни фақат режалар билан ўлчаб бўлмайди. Натижа билан ўлчанади. Бухоронинг бугунги салоҳияти — эртанги тараққиёт учун катта имконият. Аммо имкониятнинг ўзи етарли эмас. Уни тўғри режалаштириш, оқилона бошқариш ва аниқ натижага айлантириш зарур.
Зариф Комилов, ЎзА мухбири
