Хориждан юборилган қарийб 25 кг. кучли таъсир қилувчи модда тўхтатиб қолинди
Гиёҳвандлик воситаларининг ноқонуний айланмасига қарши курашиш йўналишида Давлат хавфсизлик хизмати ходимлари томонидан “Тошкент-АЭРО” ихтисослаштирилган божхона комплексининг Контрабандага қарши курашиш бўлими билан ҳамкорликда ўтказилган тезкор тадбирда хориждан олиб келинган катта миқдордаги кучли таъсир қилувчи модда тўхтатиб қолинди.
Хусусан, Хитой давлатидан юборилган жўнатмани куръерлик фаолияти билан шуғулланувчи фирманинг Тошкент шаҳридаги офисида қабул қилиб олган вақтида Юнусобод туманида яшовчи, 2000 й.т. шахс ва унинг 1998 йилда Фарғона вилоятида туғилган, ҳозирда Чилонзор туманида вақтинча истиқомат қилувчи таниши ушланди.
Чет мамлакатдан юборилган жўнатма очиб кўрилганда, унинг ичида оқ рангли кукунсимон кўринишда бўлган 24 кг. 974 гр. “Прегабалин” кучли таъсир қилувчи моддаси борлиги аниқланди.
Ҳозирда мазкур шахсларга нисбатан Жиноят Кодексининг 246-моддаси 1-қисми билан жиноят иши қўзғатилиб, “қамоқ” эҳтиёт чораси қўлланилди.
Тергов ҳаракатлари олиб борилмоқда.
Ҳамроз Баёнов,
ЎзА
