Германия ядро энергетикасига қайтиши мумкин
Германия келгуси йилларда ядро энергетикасига қайтади, чунки углерод чиқиндисини камайтириш, жамият ва иқтисодиётни ортиқча юкдан халос қилишнинг бошқа йўли йўқ, деди Бундестагнинг “Германия учун муқобил” партияси аъзоси, энергетика ва иқтисодий сиёсат бўйича парламент гуруҳи спикери Штеффен Котре "РИА Новости" агентлигига.
Аввалроқ Канцлер Фридрих Мерц ГФРнинг ядро энергетикасидан воз кечиш қарори қатъий эканини айтган. Европа Комиссияси президенти Урсула фон дер Ляйен эса бундай ташаббус кўҳна қитъа учун стратегик хатолигини тан олган эди.
Котренинг сўзларига кўра, Германия фаолияти тўхтатиб қўйилган АЭСларини қайта ишга тушириш учун ядро энергиясини вақтида тиклай оладими ёки йўқми деган савол кейинроқ ҳал қилинади.
- Саккизтагача АЭСни энг кам харажат эвазига тармоққа қайта улаш мумкин эди, - деб ҳисоблайди депутат. - Масалан, “Филиппсбург” АЭС охирги марта киловатт-соатига 2,5 евроцент электр энергияси ишлаб чиқарган. АЭС ҳамон энг тежамкор ечим бўлиб қолмоқда. Митти модулли реактор технологияси улкан салоҳиятга эга, аммо бошқа кўплаб концепциялар ҳам мавжуд. Ҳозир атом энергиясини қайта тиклаш Германия учун сиёсий вазифа. Муайян технологияни танлаш эса бозорнинг ваколати.
2011 йил ўша пайтдаги канцлер Ангела Меркел бошчилигидаги Германия ҳукумати 2022 йилга келиб атом энергиясидан бутунлай воз кечишга қарор қилганди. Ушбу қарор қабул қилинишига асосий сабаб сифатида Япониядаги Фукусима АЭСдаги ҳалокат кўрсатилган.
С.Раҳимов, ЎзА
