Франция президентлигига янги номзод қўшилди (+видео)
46 ёшли Европа парламенти депутати Рафаэль Глюксман Франция президентлиги учун ўз номзодини қўйишини маълум қилди. Шу тариқа у президентликка даъвогарларнинг рўйхатини яна бир ном билан тўлдирди, деб хабар қилди Euronews.
Сиёсатчига айланган собиқ сиёсий шарҳловчи Рафаэль Глюксман якшанба куни кечқурун келаси йили бўлиб ўтадиган Франция президентлик сайловларида иштирок этишини маълум қилди.
46 ёшли собиқ публицист ва Европа парламенти депутати ўз номзодини телевидениега берган интервьюсида расман тасдиқлади.
«Ҳа, мен ўз номзодимни қўяпман», — деди Рафаэль Глюксман. «Мен Францияни тиклаш учун ўз номзодимни қўяпман. Чунки мамлакатимизда нималар бўлаётганини ва келажакда қандай бўлиши мумкинлигини кўрганимизда, барчамизнинг дилимиз хиралашади», — деди у.
Рафаэль Глюксман 26 май куни TF1 телеканалида Франция бўйлаб уч ой давомида сафар қилиб, янги ватанпарварлик келишувини таклиф этиб ва президентлик сайловларига қадар ўз сиёсий оиласини бирлаштириш учун ўз олдига вазифа қўйганини айтди.
Шунингдек, Франциядаги сайловларда уч марта муваффақиятсизликка учраган ўнг кучлар етакчиси Марин Ле Пен 2027 йилги сайловларни Елисей саройини эгаллаш учун энг яхши имконияти деб ҳисобламоқда.
Аммо, сўровлар ёшлар орасида машҳур бўлган Рафаэль Глюксманга 10–12 фоиз атрофида овоз берилишини кўрсатмоқда. У шу қадар машҳурки, айримлар бу ҳолатни «Глюксмания» деб аташмоқда.
Файласуф Андре Глюксманнинг ўғли бўлган Рафаэль Глюксман 2009–2013 йилларда, ҳали ёш ва идеалистик қарашларга эга бўлган пайтида, Грузиянинг собиқ президенти Михаил Саакашвилининг маслаҳатчиси бўлиб ишлаган. Глюксман Европа интеграциясининг қатъий тарафдори ва Россия урушига қарши курашда Украинани ҳам фаол қўллаб-қувватлайди. У Владимир Путин бошчилигидаги Россияга нисбатан кескин позицияси билан ҳам танилган.
<iframe width="650" height="420" src="https://www.youtube.com/embed/XUfBgrVQDP0" title="Fransiya prezidentligiga yangi nomzod qo‘shildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов, ЎзА
