Фарғонада иқтидорли футболчилар ва мураббийлар тайёрлаш янги босқичга кўтарилади (+видео)
Президент ташрифидан сўнг...
Мамлакатимизда ёш иқтидорли футболчилар ва мураббийлар тайёрлаш, тажрибали кадрлар тарбиялаш мақсадида самарали ишлар ташкил қилинмоқда. Бу борада Фарғона вилояти ўзига хос тажриба эга ва истеъдодли чарм тўп усталари билан машҳур.
Бунга 1962 йилда ташкил этилган “Нефтчи” футбол клуби эришган самарали ютуқлар мисол бўла олади. Клуб Ўзбекистон Суперлигасининг 6 карра чемпиони, мамлакат кубогининг 2 карра ва суперкубокнинг 1 карра соҳиби ҳисобланади. Шунингдек, клуб 1994 йилда МДҲ кубоги финалчиси бўлган, 1994-1995 йилларда эса Осиё чемпионлар лигасида бронза медалларини қўлга киритган.
[gallery-29208]
Юртимизда профессионал футбол клублари академияларини ривожлантиришга қаратилган чоралар натижасида 2025 йилда Фарғонада “Нефтчи” болалар футбол академияси ташкил этилди.
Давлатимиз раҳбари 28 апрель куни Фарғона вилояти футбол ассоциациясига қарашли футбол маркази ва “Нефтчи” болалар футбол академиясида яратилган шароитлар билан танишди.
– Вилоятимизда футбол муҳитини ошириш, жаҳон футболи даражасига олиб чиқиш, иқтидорли маҳаллий ёшларни саралаб олиш мақсадида кенг кўламли ишлар амалга оширилмоқда. Жумладан, “Нефтчи” болалар футбол академиясига УЕФА инструктори ва бошқа халқаро экспертлар ҳам жалб қилинди, – деди Фарғона вилояти футбол ассоциацияси вице-президенти Носир Отақўзиев. – Клубда нафақат ёш футболчилар, балки, маҳаллий футбол мураббийлари, тажрибали кадрларни шакллантириш ишлари ҳам йўлга қўйилган. Бу ерда ҳомийлар томонидан ҳаво шари сунъий қопламали ёпиқ футбол майдони ўрнатилган. Академияда спортчиларнинг машғулот ва юкламалардан тезкор тикланиши учун энг замонавий тиббий технологиялар жорий этилган, бу жароҳатларнинг олдини олиш ва футболчиларнинг жисмоний ҳолатини халқаро стандартларга мослаштириш имконини беради.
Давлатимиз раҳбарининг “Нефтчи” болалар футбол академияси фаолияти билан танишиши водий футболи ривожида муҳим босқич бўлди.
<iframe width="560" height="315" src="https://www.youtube.com/embed/kDZKrMwZy9o?si=OCWWRoJgXAGKV6FU" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Абдулазиз РУСТАМОВ,
Носиржон ҲАЙДАРОВ (сурат),
Ёқуб МЕЛИБОЕВ (видео),
ЎзА
