Эрон: Рақобатчи ОАВга интервью – қамоқ...
Эрон парламенти мамлакат разведка вазирлиги томонидан “душман” деб топилган хорижий оммавий ахборот воситалари билан интервью ёки муҳокамада қатнашиш жиноят сифатида белгиланиши кўзда тутилган қонун лойиҳасини маъқуллади. Ҳужжатни 174 депутат қўллаб-қувватлаган, олти нафар ноиб рад этган.
Лойиҳанинг 22-моддасига кўра, Ислом Республикаси фуқароси душман сифатида эътироф этилган хорижий нашрга интервью берса ёки шундай ОАВ вакили билан муҳокамада иштирок этса, олти ойдан икки йилгача қамалиши, жарима тўлаши, 31-74 дарра жазосига тортилиши ёки айрим ижтимоий ҳуқуқдан маҳрум қилиниши мумкин. “Душман давлатлар” рўйхати икки тоифага ажратилади: биринчи тоифага Эрон қонуни ёки Миллий хавфсизлик олий кенгаши қарори билан душман этиб белгиланган мамлакатлар, иккинчи тоифага эса Теҳроннинг сиёсий, мудофаа, хавфсизлик, иқтисодий, ижтимоий ёки маданий манфаатига зарар етказишга қаратилган ҳаракатни амалга оширган давлатлар киритилади. Иккинчи тоифа рўйхатини Разведка вазирлиги ва Ислом инқилоби қўриқчилари корпуси разведка ташкилоти шакллантиради.
Мазкур ташаббус Президент Масъуд Пезешкиён ҳукумати қаршилигига қарамай, парламентдан ўтди. Ҳукумат ҳужжат илмий фаолиятга тўсиқ бўлиши, малакали кадрлар хорижга чиқиб кетиши жараёнини кучайтириши ва фуқаролик ҳуқуқига салбий таъсир кўрсатиши мумкинлигидан хавотир билдирган. Ҳали қонун кучга киргани йўқ. Парламент қолган моддаларни кўриб чиққач, ҳужжат Конституция ва шариатга мувофиқликни текширувчи Қўриқчилар кенгашига юборилади. Кенгаш эътироз билдирса, парламент эса ўз фикрида қолса, якуний қарорни Манфаатни мувофиқлаштириш кенгаши қабул қилади.
Мусулмон Зиё, ЎзА
