Эрон Ҳурмузни барча кемалар учун ёпди
Эрон АҚШ зарбаларидан сўнг стратегик аҳамиятга эга Ҳурмуз бўғози барча кемалар учун ёпилганини эълон қилди. Бу қарор минтақавий кескинликни янги босқичга кўтармоқда.
Америка томонидан берилган сўнгги зарбалардан сўнг Теҳрон Ҳурмуз бўғозини барча турдаги кемалар ҳаракати учун ёпганини эълон қилди. Бу ҳақда “Tasnim” ахборот агентлиги хабар берган. Эрон Қуролли кучлари Марказий қўмондонлиги баёнотига кўра, минтақадаги кескин вазият ва Вашингтоннинг ҳарбий ҳаракати сабабли стратегик аҳамиятга эга ушбу бўғозда ҳаракатланиш вақтинча тақиқланган.
Расмий маълумотга кўра, жорий этилган чеклов нефть танкерларидан тортиб, оддий савдо кемаларигача, барча турдаги денгиз транспорти воситаларига тегишли. Мазкур кескин қарор Америка армиясининг Ҳурмузгон вилоятидаги айрим ҳудудларга уюштирилган ҳужумга жавоб сифатида изоҳлаган. Бундан олдин АҚШ Марказий қўмондонлиги (CENTCOM) Эрон ҳудудидаги бир неча ҳарбий нишонга зарба йўлланганини тасдиқлаган эди. Вашингтон ушбу амалиёт фақат ўзини ҳимоя қилиш мақсадида амалга оширилганини даъво қилмоқда.
Ф.Яхшибоева, ЎзА
