Энергетика ҳафталигида кўргазмалар иш бошлади (+видео)
Энергетика соҳасининг мамлакатимиз равнақида тутган ўрни юқори. Шу боис бу борада ташкил этилган ҳар бир тадбирга кенг жамоатчилик, корхона-ташкилот, йирик компанияларда эътибор доимо катта бўлган.
Маълумки, шу йилнинг 12-14 май кунлари “CАЕхUzbekistan” кўргазма мажмуасида ёқилғи-энергетика соҳасидаги бир қатор муҳим кўргазма ва анжуманларни бирлаштирган “28-Ўзбекистон энергетика ҳафталиги –UEW 2026” ўз ишини бошлади. Бу галги кўргазма “Iteca Exhibitions” халқаро кўргазма компанияси ва унинг ҳамкорлари Энергетика вазирлиги ва “Ўзбекнефтгаз” АЖнинг анъанавий расмий қўллаб-қувватлаши остида ўтказилмоқда.
Бу ерда бир вақтнинг ўзида нефть ва газ, энергетика, муқобил энергия манбалари ва уни тежовчи технологиялар намойиш этилмоқда. 34 мамлакатдан 580 та компания ва бренд эгалари, 140 нафар спикер ва модератор ҳамда 1 500 нафардан ортиқ делегат иштирок этмоқда. Шулардан 85 нафари илк бор қатнашмоқда.
- Бу қурилма кичик метеостанция бўлиб, катта ҳудуддаги метереологик қурилмаларни билаштириб, бошқариб туради, - дейди кўргазма иштирокчиси Россия компанияси вакили Илья Бузинов. –У атмосфера босими, намлиги ва ҳаво оқимини, шамол тезлигини бир вақтнинг ўзида аниқлай олади. Қурилманинг бошқалардан фарқи кичик ҳажмда бўлсада, катта вазифани бажара олади. Асосан аэропортларда уни кўпроқ қўллашади. Яна ушбу қурилма ёрдамида экологик ўзгаришларни ҳам аниқлаш мумкин. Афзаллик томони 60 даража иссиқда ёки ҳаво совиб кетса, унинг техник характеристикалари ўзгармайди, аниқ ўлчамлар тақдим этади.
Эътиборли тарафи ҳар бир намойишда энергия тежамкорлик ва атроф-муҳит муҳофазасига устуворлик берилган. Ўзбекистон соҳани модернизация қилиш, замонавий технологияларни жорий этиш ва атроф-муҳитга таъсирни камайтириш бўйича изчил чора-тадбирларни амалга оширмоқда. Бу эса кўргазмада намойиш этилган ҳар бир янги ишланмада акс этиб турди.
Ҳар доимгидек, Хитой компаниялари кўргазма иштирокчиларининг катта қисмини ташкил этди. Уларнинг жамоавий стенди 155 та компаниянинг нефть ва газ ускуналари, инновацион технологиялари, хизматлар ва бошқа маҳсулотларнинг хилма-хил турларини ўз ичига олган ўнлаб павильонларда намойиш қилинди. Таққослаш учун Италия стенди 11 та ва Корея Республикасининг жамоавий стендида 7та муҳандислик ечимлари ва технологиялари тақдим этилди холос.
Ўн учта маҳаллий компанияларимиз томонидан инжиниринг ва қурилиш технологиялари, шунингдек, ишлаб чиқариш ва қайта ишлаш, қудуқларни таъмирлаш хизматлари, нефть конлари ускуналарига техник хизмат кўрсатиш, кимёвий маҳсулотларни ишлаб чиқариш, нефть қазиб олишни кўпайтириш, ускуналар ва транспорт хизматларини намойиш этишди. Қувонарлиси бизни компаниялар хорижникидан қолишмайдиган янги ишланмалари билан кўпроқ иштирок этмоқда.
Албатта ушбу тадбир профессионал алоқаларни мустаҳкамлаш, бозор иштирокчилари ўртасидаги мулоқотни ривожлантириш ва энергетика соҳасига замонавий ёндашувларни илгари суришга ёрдам беради.
<iframe width="650" height="420" src="https://www.youtube.com/embed/G8fGZRtFedk" title="Energetika haftaligida ko‘rgazmalar ish boshladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов, Нишонбой Абдувойитов, Улуғбек Тўхтаев, ЎзА
