ЕИ РФга қарши санкцияни илк бор бир йилга узайтирди
Европа Иттифоқи давлатлари Брюсселда бўлиб ўтган саммитда Россияга қарши жорий этилган санкцияни илк бор олти ой эмас, балки бир йил муддатга узайтириш бўйича қарор қабул қилди.
Маълум қилинишича, ушбу ҳужжат яқин ҳафталарда ЕИ Кенгаши томонидан расман тасдиқланиши кутиляпти.
Санкция муддатини узайтириш бўйича келишувга Венгрия томонидан вето қўйилмагани сабабли эришилди. Илгари бу масала ечимини расмий Будапешт ёндашуви қийинлаштираётган эди. Мамлакатда ҳукумат алмашгач, янги Бош вазир Петер Мадьяр мазкур ташаббусни қўллаб-қувватлади.
Шунингдек, анжуман доирасида Россия – Украина низосига оид декларация ҳам қабул қилинди. Ҳужжатни ЕИга аъзо барча 27 давлат қўллаб-қувватлади. Шу тариқа 2024 йил декабридан бери илк бор тузилмага аъзо барча мамлакатлар якдил қарашини намоён этди.
Декларацияда ЕИ Россияга босимни янада кучайтириши, РФ ҳарбий иқтисодиётини заифлаштиришга интилиши ифодаланган, Москвани мазмунли тинчлик музокарасига жалб этиш нияти билдирилган.
Д.Ҳакимов, ЎзА
