Дубайга олиб кетилаётган салкам 2 кг олтин тўхтатиб қолинди
Давлат хавфсизлик хизмати ва “Тошкент-Аэро” ихтисослаштирилган божхона комплекси ходимлари ҳамкорлигида Тошкент халқаро аэропортида ўтказилган тезкор тадбир натижасида катта миқдордаги олтин қуймаларнинг мамлакатдан ноқонуний олиб кетилишига чек қўйилди.
Хусусан, “Тошкент – Дубай” йўналиши бўйича парвоз қилишни режалаштирган, 1980 йилда Андижон вилоятида туғилган, ҳозирда Тошкент шаҳрида яшовчи шахснинг юклари текширувдан ўтказилди.
Натижада унга тегишли чемоданнинг ички таянч қисмига жами
1 кг 923 гр олтин қуймалар яширилганлиги аниқланиб, ашёвий далил сифатида расмийлаштириб олинди.
Шунингдек, ушбу ноқонуний ишга 1992 йилда Тошкент вилоятида туғилган, муқаддам Жиноят Кодексининг 182-моддаси билан судланган фуқаронинг алоқадорлиги аниқланди.
Ҳозирда ҳолат юзасидан терговга қадар текширув ҳаракатлари олиб борилмоқда.
Ҳурматли фуқаролар, кундалик ҳаётда шу каби қонунбузилиш ҳолатларига дуч келсангиз ДХХнинг 1520 қисқа рақамига қўнғироқ қилиб, хабар беринг. Шахсингизнинг сир сақланиши кафолатланади.
