COP31: Өзбекстан мен Қазақстан өнеркәсіпке экологиялық технологияларды енгізу жөнінде келісті
Өнеркәсіптің өркендеуі – экономикалық өсімнің негізгі қозғаушы күштерінің бірі. Дегенмен өндіріс қарқынын арттырумен қатар, оның табиғатқа тигізетін кері әсерін азайтып, экологиялық тепе-теңдікті сақтау да айрықша маңызға ие.
Осыған байланысты Өзбекстан өнеркәсіп салаларына ең озық технологияларды енгізу, өндірісте ресурстарды ұтымды пайдалану және зиянды шығарындыларды қысқарту бағытындағы халықаралық ынтымақтастықты кеңейтіп келеді.
БҰҰ-ның Климаттың өзгеруі жөніндегі негіздемелік конвенциясы Тараптарының 31-конференциясы (COP31) аясында Өзбекстан павильонында елдің ең озық технологияларды енгізу жөніндегі ұлттық тәсілі таныстырылды.

Іс-шарада Мемлекеттік экологиялық сараптама орталығы бас директорының орынбасары Вячеслав Ши-Сян өнеркәсіпті экологиялық жаңғырту, атмосфераға таралатын зиянды шығарындылар мен парниктік газдар көлемін азайту, су, энергия және шикізатты тиімді пайдалану бағытында атқарылып жатқан жұмыстар туралы баяндады. Оның айтуынша, Өзбекстанда Дүниежүзілік банкпен бірлесіп, ең озық қолжетімді технологияларға көшу жөніндегі «жол картасы» әзірленіп жатыр. Оған Ташкент қаласы мен облысындағы ірі өнеркәсіп және энергетика нысандары, соның ішінде цемент және минералды тыңайтқыштар өндіретін кәсіпорындар, жылу энергетикасы нысандары мен ірі қазандықтар қамтылады.

Сала өкілдерінің айтуынша, бұл бастама ұлттық деңгейдегі реформалармен ғана шектелмейді. COP31 аясында Мемлекеттік экологиялық сараптама орталығы бас директорының орынбасары Вячеслав Ши-Сян мен Қазақстанның «Жасыл технологиялар және инвестициялық жобалардың халықаралық орталығы» басқармасының төрағасы Сәкен Қалқаманов Өзбекстан мен Қазақстан арасындағы ынтымақтастық туралы келісімге қол қойды.
Құжат химия, энергетика және цемент өнеркәсібіне арналған ең озық қолжетімді технологиялар бойынша салалық анықтамалықтарды бірлесіп әзірлеуді, кәсіпорындарға кешенді технологиялық аудит жүргізуді, мамандардың біліктілігін арттыруды және цифрлық платформаны дамытуды көздейді.

Сонымен қатар, Орталық Азияда ең озық қолжетімді технологиялар бойынша өңірлік бюро құру және технологиялық деректер алмасуға мүмкіндік беретін цифрлық платформа әзірлеу мүмкіндіктері де талқыланды.