Чжан катта бизнес эгаси

Ганьсу провинциясининг Луннаня шаҳрилик Чжан Насинь болалигидан деҳқончилик ва ўсимликлар етиштиришга қизиқарди. Ўз мақсадига етишиш учун аввал мукаммал билим олишга интилди. У АҚШнинг Колумбия шаҳридаги Жанубий Каролина университетида тўрт йил ўқиб, маркетинг, тадбиркорлик бошқаруви ва таъминот занжири бошқаруви йўналишларида таҳсил олди. Бразилияда назарий билимларини амалиётда мустаҳкамлади.

"90-йиллар авлоди" вакили бўлган ёш қиз хориждан қайтгач, дастлаб қишлоқ хўжалиги экинлари учун бойитилган ўғит етиштириш билан шуғулланди. Орадан кўп ўтмай иссиқхона шароитида қўзиқоринлар етиштиришга киришди.

Бугун тадбиркор, янгиликка интилувчан Чжан катта бизнес эгаси. Ҳам деҳқончилик, ҳам илмий тадқиқотлар олиб бориб, йирик қўзиқорин етиштириш корхонаси ҳамда ишлаб чиқариш мажмуаси ва агротуризмнинг янги моделига асос солди. Асосан осма усулда етиштирилаётган “морчел”, “олтин қулоқ”, “қора ва оқ ёғоч қулоғи”, “опёнок” каби 18 турдаги қўзиқорин турлари Хитойнинг шарқидан ғарбигача бўлган истеъмолчиларга етказиб берилмоқда. Айнан унинг саъй-ҳаракатлари билан округ "Хитойнинг “қора ёғоч қулоғи” қўзиқорини ватани", "Хитойда “қора ёғоч қулоғи” қўзиқорини етиштирувчи йирик ҳудуд", "Қора ёғоч қулоғи” қўзиқорини саноати орқали қишлоқларни ривожлантириш миллий дастурини илгари суриш бўйича муҳим ҳудуд" фахрий унвонларига сазовор бўлди.

– Ўшанда ватанимга бор-йўғи битта рюкзак билан келгандим, ҳозир эса барча буюмларимни олиб кетиш учун ўнта машина ҳам етарли бўлмайди, – дейди Чжан Насин.

Эътиборлиси, мажмуага ташриф буюрган сайёҳлар иссиқхоналардан ўзлари ёқтирган қўзиқоринларни териб олишлари, шу ерда пишириб ейишлари ёки эркин нархларда харид қилишлари мумкин. Бундай шароит одамларни қўзиқоринларнинг хилма-хиллиги билан таништиради ва уларга табиат билан янада яқинроқ боғланиш имконини беради.

<iframe width="1446" height="814" src="https://www.youtube.com/embed/_blNtInXlOw" title="Chjan katta biznes egasi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Рустам Орипов, Элёр Олимов (видео) ЎзА