Буюк Британия қироли АҚШга келди ва Трамп билан учрашди (+видео)
Буюк Британия қироли Чарлз III АҚШга расмий ташриф билан келди, деб хабар берди DW нашри.
Бу ташрифни АҚШ ва Британия ўртасидаги муносабатлар Эрон билан боғлиқ уруш сабаб таранглашган бир пайтга тўғри келди дейиш мумкин. Дональд Трамп ва унинг рафиқаси Мелания Трамп қирол ва қиролича Камиллани Оқ уйда қабул қилди.
27 апрель куни етиб келган қирол ва унинг рафиқаси ташриф доирасида бир қатор учрашувларда иштирок этади. Режага кўра, Чарлз III АҚШ Конгрессида нутқ сўзлайди. Бу Британия монархи томонидан Конгрессда айтилган иккинчи нутқ бўлади, бундан аввал 1991 йилда қиролича Елизавета II чиқиш қилган.
Шундан сўнг, қирол ва қиролича Нью-Йоркка бориб, 2001 йил 11 сентябр теракт қурбонлари хотирасига бағишланган тадбирда иштирок этади.
Бу Британия қиролининг АҚШга 2007 йилдан бери биринчи ташрифи ҳисобланади. Ташриф кучайтирилган хавфсизлик чоралари остида ўтмоқда. Бунга 25 апрель куни бўлиб ўтган тадбирдаги отишма сабаб дейиш мумкин. Associated Press маълумотига кўра, Чарлз III АҚШга “нозик” вазифа билан келган. Унинг мақсади — сўнгги вақтларда АҚШ ва Британия ўртасида Эрон билан боғлиқ можаро туфайли совиб қолган муносабатларни тиклаш.
Март ойида Британия бош вазири Кир Стармер АҚШга Эронга қарши зарба бериш учун Британия базаларидан фойдаланишга рухсат бермаган эди. Шунингдек, у Ҳурмуз бўғозига ҳарбий кемалар юборишни рад этди.
Шундан кейин Дональд Трамп Британия флотини танқид қилиб, унинг кемалари эски эканини айтди. Хуллас, муносабатларга дарз кетди. Трамп шунингдек, НАТО давлатларини ҳам Эронга нисбатан позицияси учун танқид қилган ва ҳатто альянсдан чиқиш эҳтимолини ҳам ўртага ташлаган.
Ўз навбатида, Кир Стармер энергия нархларининг ўзгаришига дунёдаги сиёсий қарорлар, жумладан Россия президенти Владимир Путин ва Дональд Трамп ҳаракатларини сабаб қилиб, танқид қилган эди.
Шунга қарамай, Трамп Британия қиролининг ташрифига бу сиёсий келишмовчиликлар таъсир қилмаслигини айтган. У Чарлз III ни “яхши инсон ва дўст” деб атаган.
<iframe width="640" height="420" src="https://www.youtube.com/embed/msFctOo0XZY" title="Buyuk Britaniya qiroli AQSHga keldi va Tramp bilan uchrashdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe> Кенжа Бекжонов, Анвархўжа Аҳмедов (видео), ЎзА
