Бокс: Ҳасанбой Дўсматов ва Иқболжон Холдоров илмий тадқиқот марказида
Бугунги кунда спорт биомеханикаси, сунъий интеллект ва рақамли ҳаракат таҳлилларини ўзаро интеграциялаш замонавий спорт тайёргарлигининг энг устувор йўналишларидан бири сифатида эътироф этилиши ортидан Ўзбекистон давлат жисмоний тарбия ва спорт университети лабораториясида боксчиларнинг техник ҳаракатларини кинематик моделлаштиришга қаратилган инновацион тадқиқотлар амалга оширилиб келинмоқда.
Илмий тадқиқотларнинг навбатдаги босқичида бокс бўйича Ўзбекистон терма жамоаси аъзолари, 2016, 2024 йилги ёзги Олимпия ўйинлари ғолиби, жаҳон ва Осиё чемпиони Ҳасанбой Дўсматов ҳамда ёзги Осиё ўйинлари ғолиби, жаҳон чемпионати совриндори Иқболжон Холдоров иштирок этди.
Тадқиқотлар жараёнида замонавий илмий ўлчов ускуналари мажмуасидан фойдаланган ҳолда спортчиларнинг техник ҳаракатлари уч ўлчовли форматда таҳлил қилинди.
Шунингдек, тегишли қурилмалар ёрдамида реакция тезлиги ва координация кўрсаткичлари, мушак кучи, ёғ ва мушак массаси ҳамда сув баланси баҳоланди.
Тадқиқот давомида боксчиларнинг зарба бериш механикаси, ҳаракат координацияси, мувозанат, тезкорлик ҳамда тана сегментлари ўртасидаги функционал боғлиқликлар биомеханик ва кинематик жиҳатдан ўрганилди.
Олинган натижалар асосида спортчиларнинг индивидуал техник моделлари ишлаб чиқилиб, зарба техникаси самарадорлигини ошириш ҳамда жароҳатланиш хавфини камайтиришга қаратилган илмий тавсиялар ишлаб чиқилиши кутилмоқда.
Мазкур илмий-амалий ишлар натижасида спортчиларнинг техник-тактик тайёргарлигини такомиллаштириш, халқаро мусобақалардаги натижадорлигини ошириш ҳамда Ўзбекистонда спорт биомеханикаси йўналишини янги босқичга олиб чиқиш назарда тутилган.
Т. Рўзиев, ЎзА
