Боғда кўчат эмас, хавф ўсган

Жамият осойишталиги ва аҳоли саломатлигига таҳдид солувчи иллатлар ўз-ўзидан йўқолмайди. Уларга қарши курашда ҳушёрлик ва тезкорлик қанча кучли бўлса, хавфнинг илдиз отишига шунча эрта чек қўйилади. Жиззахда аниқланган навбатдаги ҳолат эса бунга яна бир далил.

Жиззах шаҳар ИИБ тезкор ходимлари томонидан “Хавфсиз ва соғлом юрт” ойлиги доирасида ўтказилган тадбир давомида хонадонида каннабис етиштираётган фуқаро аниқланди.

Шаҳарнинг Амир Темур маҳалласида яшовчи, 1964 йилда туғилган фуқаро Б.Б.нинг хонадони холислар иштирокида кўздан кечирилди. Ҳовлининг боғ қисми ва тувакларда жиззахлик “каннабисшунос” томонидан жами 6 туп каннабис ўсимлиги парваришлаб келинаётгани маълум бўлди.

Одатда боғ деганда кўз олдимизга ризқ-рўзғорга хизмат қиладиган мевали дарахт, гул ёки фойдали кўчатлар келади. Бу ҳовлида эса боғнинг маъноси ҳам, “ҳосил”нинг мазмуни ҳам бутунлай бошқача тус олган. Зеро, қонунга хилоф экилган ҳар қандай кўчат эрта-индин муаммонинг ўзига айланиши мумкин.

Тезкор тадбирнинг яна бир манзили – омборхонанинг том қисми бўлди. У ердан қуритилган, ўткир ҳидли, марихуана гиёҳвандлик моддасига ўхшаш ўсимлик майдалари топилди. Уларнинг умумий миқдори 35,08 граммни ташкил этган ва белгиланган тартибда ҳужжатлаштириб олинган.

Шундай қилиб, ҳовлидаги 6 туп ўсимлик билан чекланиб қолмаган “сир” том остида ҳам давом этгани маълум бўлди. Кўзга оддий кўринган хонадонда яширинган бу ҳолат тезкор ходимларнинг эътибори билан фош этилди.

Бу ерда энг ачинарлиси зарарли иллатнинг фақат кўчат шаклида эмас, балки инсон онгида ҳам илдиз отиши мумкинлигидир. Гиёҳвандлик билан боғлиқ ҳар қандай ҳаракат бир шахснинг эмас, унинг атрофидаги муҳитнинг ҳам хавфсизлигига дахл қилади. Шу боис бундай ҳолатларни ўз вақтида аниқлаш ва уларга ҳуқуқий баҳо бериш муҳим.

Гиёҳвандликка қарши кураш фақат тезкор тадбир билан тугамайди. Унинг энг самарали йўли – иллатни илдиз оттирмаслик. Бунинг учун оила, маҳалла ва жамиятда ҳушёрлик муҳитини кучайтириш, шубҳали ҳолатларга бефарқ бўлмаслик зарур.

Айни пайтда мазкур ҳолат юзасидан жиноят иши қўзғатиш чоралари кўрилмоқда. Воқеанинг ҳуқуқий баҳоси эса қонунчиликда белгиланган тартибда берилади.

Зеро, хонадонда нимани экиш ва нимани сақлаш масаласи фақат шахсий танлов эмас. Қонун тақиқлаган ўсимликнинг илдизи қаерда отишидан қатъи назар, унинг оқибати жамиятга дахл қилади. Жиззахдаги бу ҳолат эса бир ҳақиқатни яна бир бор кўрсатди: боғда ҳар қандай кўчат ўсавермайди, қонун бор жойда хавфга ҳам илдиз отишга йўл йўқ.

Абдужалол Қаюмов, ЎзА мухбири