"Атлас байрами" фестивали: қадимий чоклар замонавий ижодда акс эттирилди
"Атлас байрами" фестивали доирасида таниқли уста каштадўз Мадина Қосимбоева бошчилигида миллий каштачилик санъати бўйича амалий маҳорат дарси бўлиб ўтди.
Маълумки, каштачилик мамлакатимиз амалий-безак санъати турлари орасида ўзининг қадимий анъаналарига эга бўлган аёллар шуғулланиб келган санъат тури ҳисобланади. Ўзбек кашталарининг ноёблиги ва гўзаллиги, унинг безак-нақшлари ва техник усулларининг кўплиги ва қадимлиги ушбу санъатнинг бой анъаналаридан далолат беради.
Машғулот давомида Ўзбекистоннинг бой каштачилик мактаби анъаналари, қадимий сўзана ва илмоқ услубларини сақлаб қолган ҳолда уларга янгича ҳаёт бағишлаш усуллари кўрсатиб берилди. Амалий машғулотларда каштачилик йўналишида қадимий чок турлари, йўрмадўзлик, босма ва ироқи чок техникалари амалда қўлланилди.
Шунингдек, иштирокчиларга кашта тикаётганда композиция ва рамзийлик, каштадаги анъанавий гул ва нақшлар, жумладан, анор, бодом гулларини солаётганда маъносини тўғри танлаш ҳамда матога тушириш хусусида тушунчалар берилди.
Гулноза Бобоева,ЎзА
