АҚШ ва Эрон: санкциялар юмшатилди, ядровий келишув эса баҳсли қолмоқда (+видео)
АҚШ Эроннинг нефть ва нефть маҳсулотлари савдосига нисбатан йиллар давомида қўллаб келган санкцияларни 60 кунга вақтинча тўхтатди, деб хабар берди ВВС нашри.
АҚШ Молия вазирлиги 21 августга қадар Эрон нефти ва нефть маҳсулотлари маҳсулотлари билан доллар орқали савдо қилиш, шунингдек, банк ва суғурта хизматларидан фойдаланишга рухсат берувчи махсус лицензия берди. Бу орқали Эрон нефтини етказиб бериш жараёнида воситачиларга эҳтиёж камаяди, ҳатто тўғридан-тўғри етказиб бериш имкони ҳам пайдо бўлади.
АҚШ ва Эрон ўртасида 17 августда имзоланган англашув меморандумида Вашингтон Эронга нисбатан барча турдаги санкцияларни босқичма-босқич бекор қилиш мажбуриятини олгани қайд этилган.
Ҳужжатга кўра, вақтинчалик даврда АҚШ санкцияларни юмшатиш бўйича чоралар кўриши керак. АҚШ Молия вазирлиги буни амалга ошириш йўлида биринчи қадам сифатида лицензия берган.
Меморандумда Эрон ҳам 60 кун ичида Ҳурмуз бўғозини ёпмаслик ва Халқаро атом энергетика агентлиги инспекторларига йўл очиш мажбуриятини олгани айтилган.
АҚШ вице-президенти Жей Ди Вэнснинг маълум қилишича, халқаро атом энергетика агентлиги инспекторларини Эронга қайта киритиш бўйича музокаралар яқин кунларда бошланиши мумкин. Бироқ Эрон бу даъволарни рад этди. Мамлакат ташқи ишлар вазирлиги АҚШ билан бўлиб ўтган музокараларда ядровий дастур бўйича янги мажбуриятлар қабул қилинмаганини билдирди.
Эрон ҳукумати Халқаро атом энергияси агентлиги билан ҳамкорлик фақат миллий парламент ва миллий хавфсизлик кенгаши белгилаган мавжуд қоидалар асосида амалга оширилишини таъкидлади. Ҳозирча агентлик бу вазиятга изоҳ бермаган.
<iframe width="640" height="420" src="https://www.youtube.com/embed/JK8C-48BHis" title="AQSH va Eron: sanksiyalar yumshatildi, yadroviy kelishuv esa bahsli qolmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов (видео), ЎзА
