АҚШ Кубанинг йирик давлат компанияларига янги санкциялар жорий қилди (+видео)
АҚШ Куба иқтисодиёти учун муҳим аҳамиятга эга бўлган бир қатор давлат компанияларига қарши янги санкциялар жорий қилди, деб хабар қилди DW нашри.
АҚШ давлат котиби Марко Рубионинг маълум қилишича, санкциялар бешта Куба компаниясига нисбатан қўлланилган бўлиб, уларнинг учтаси мамлакат Қуролли кучлари назоратидаги йирик иқтисодий бирлашма билан боғлиқ.
Турли ҳисоб-китобларга кўра, бу бирлашма Куба ялпи ички маҳсулотининг қарийб 40 фоизини назорат қилади. Шунингдек, 2024 йил ҳолатига кўра, унинг молиявий захиралари 14,5 миллиард долларга баҳоланган.
Санкция остига тушган компаниялар ташқи савдо, хорижий инвестициялар, молиявий операциялар ҳамда пўлат ишлаб чиқариш соҳаларида фаолият юритади. Шунингдек, Куба Миллий хавфсизлик кенгаши раҳбари ва Рауль Кастронинг ўғли Алехандро Кастронинг турмуш ўртоғига нисбатан ҳам чекловлар жорий этилди.
Марко Рубионинг таъкидлашича, Куба ҳукумати йирик иқтисодий бирлашма орқали ўз манфаатларини таъминлаш, репрессиялар, жосуслик ва Америкага қарши фаолиятни молиялаштиради.
Куба ташқи ишлар вазири Бруно Родригес эса янги санкцияларни «шафқатсиз босим ва жамоавий жазо» деб атади ҳамда Марко Рубиони кескин танқид қилди.
Шу билан бирга, АҚШ Олий суди америкалик компанияларга Фидель Кастро даврида давлат тасарруфига ўтказилган мулклари учун товон пули талаб қилиб судга мурожаат қилиш ҳуқуқини тасдиқлади.
Мутахассислар фикрича, бундай қарорлар Вашингтон ва Гавана ўртасидаги муносабатлардаги кескинликни янада кучайтириши мумкин.
<iframe width="640" height="350" src="https://www.youtube.com/embed/T9a7W8tFXh4" title="AQSH Kubaning yirik davlat kompaniyalariga yangi sanksiyalar joriy qildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салим Обиджонов, ЎзА
