Apple әлемдегі ең қымбат компания мәртебесін қайта иеленді
Apple компаниясы Nvidia-ны басып озып, әлемдегі ең қымбат компания мәртебесін қайтарып алды.
Bloomberg мәліметіне сәйкес, 30 қазанда Apple акцияларының бағасы 1,2 пайызға төмендеп, сауда күнінің соңында компанияның нарықтық капиталдандыруы 5,03 триллион долларды құрады. Ал Nvidia акциялары 4,2 пайызға арзандап, компанияның нарықтық құны 4,93 триллион долларға дейін түсті. Бұған дейін Apple шілде айының соңында Nvidia-дан қысқа мерзімге озып шыққан еді.
Агенттік дерегінше, инвесторлар жасанды интеллектке жұмсалатын шығындарға қатысты алаңдаушылыққа байланысты iPhone өндірушісін анағұрлым сенімді актив ретінде қарастыра бастаған. Акциялар бағасының төмендеуі Intel мен Amazon компанияларының әлсіз қаржылық есебінен кейін байқалды. Бұл нәтижелер жасанды интеллект саласына бағытталған шығындардың болашағына қатысты сауалдарды қайта көтерді.
БАҚ хабарлауынша, Alphabet пен Amazon компанияларының еркін ақша ағыны жасанды интеллектке жұмсалған шығындар салдарынан теріс көрсеткішке түскен. Компаниялар қарыз нарығынан барған сайын көбірек қаражат тартуда, ал пайыздық мөлшерлемелердің өсуі несие алуды қымбаттатып отыр.
Технологиялар нарығындағы инвесторлардың алаңдаушылығы жасанды интеллект инфрақұрылымына бағытталған орасан зор инвестициялар мен шығындардың әзірге корпорациялар табысының өсуіне айтарлықтай ықпал етпей отырғанымен байланысты.
