2,2 миллиард сўмлик божхона тўловини тўламасликка уриниш фош этилди
17,5 миллиард сўмлик совутиш тизими ускуналарини божхона имтиёзларидан ноқонуний фойдаланган ҳолда расмийлаштириш орқали давлат бюджетига тўланиши лозим бўлган 2 миллиард 212 миллион сўмлик божхона тўловларини тўламасликка уриниш ўз вақтида аниқланди.
Давлат бюджетига ундирилиши лозим бўлган божхона тўловларидан ноқонуний равишда қочишга қаратилган навбатдаги уриниш Тошкент шаҳар божхона бошқармасининг «Тошкент-товар» ТИФ божхона пости ходимлари томонидан фош этилди.
Маълум бўлишича, хорижий давлатдан Ўзбекистон ҳудудига умумий қиймати 17,5 миллиард сўмлик совутиш тизими ускуналари — чиллер тизими олиб кирилган.
Бироқ тадбиркор томонидан товарларни божхонада расмийлаштириш жараёнида амалдаги имтиёзлардан ноқонуний фойдаланишга уринилган. Хусусан, юк ҳужжатларида мазкур товарлар «совутиш тизими механик қурилмаларининг қисмлари» сифатида кўрсатилган. Шу орқали товарларга нисбатан божхона имтиёзларини қўллашга асос яратиш ва натижада тўланиши лозим бўлган божхона тўловларини камайтириш мақсад қилинган.
Божхона назорати жараёнида эса тақдим этилган маълумотларнинг ҳақиқатга мос келмаслиги аниқланди. Натижада божхона имтиёзларидан суиистеъмол қилиш орқали давлат бюджетига 2 миллиард 212 миллион сўм миқдоридаги божхона тўловларини тўламасликка уриниш содир этилгани маълум бўлди. Аниқланган ҳолатдан сўнг товарларга нисбатан қўлланилган божхона имтиёзлари бекор қилинди. Ҳозирда мазкур товарлар вақтинча сақловга олинган. Ҳолат юзасидан белгиланган тартибда суриштирув ишлари олиб борилмоқда.
Мазкур ҳолат божхона расмийлаштирувида товарларнинг номи ва таснифини ҳужжатларда тўғри кўрсатиш, шунингдек, божхона имтиёзларидан қонуний ва белгиланган мақсадларда фойдаланиш муҳим эканини яна бир бор кўрсатмоқда.
Ш.Маматуропова, ЎзА
