Мамлакатимизда хотин-қизларнинг ҳуқуқ ва қонуний манфаатларини ҳимоя қилишга қаратилган кенг кўламли ишларга қарамай, афсуски, жамиятда оилавий-маиший зўравонлик жиноятидан жабрланаётганлар ҳам бор. Зўравонликка учраган аёлларга ҳимоя ордери берилади, аммо аёл яна зўравоннинг уйида қолишга мажбур бўларди.

Қонунчилик палатасининг мажлисида иккинчи ўқишда кўриб чиқилган қонун лойиҳаси айни масалаларга қаратилганлиги билан аҳамиятлидир. Унга кўра, эндиликда жабр кўрган аёл яна ўша хонадонда қолдирилмайди. Икки тараф келишиб, янги жойга ўтиши, агар ижарага олинган уй бўлса, ижара пулини зўравонликка учраган аёл эмас, мулкдор тўлаши бўйича норма киритилмоқда.  

— Ушбу қонун лойиҳасига кўра, турар жойдан фойдаланиш ҳақидаги низолар кўриб чиқилаётганда, суд тарафларнинг келишувига асосан мулкдорнинг ташаббусига кўра, уй-жойга мажбурий тартибда киритилаётган тарафни мутаносиб шароитга эга бўлган бошқа турар жойга киритиши ёки ижарага олинган турар жой учун ижара ҳақини тўлаш мажбуриятини мулкдорга юклаши мумкин, — деди депутат Умида Раҳмонова. — Уй-жой кодексининг 32-моддасига киритилаётган норма билан ушбу тартиб жорий қилинмоқда. Мазкур қонун лойиҳасининг қабул қилиниши уй-жой низоларини кўриб чиқишда мулкдорнинг манфаатларини инобатга олиш билан бирга, хотин-қизларга яшаш учун қулай шароит яратиш ҳамда оила ва хотин-қизлар бошқаруви тизимини такомиллаштиришга хизмат қилади.  

Қонун, шунингдек, ички миграцияни янада эркинлаштиради.

Муҳтарама Комилова,

ЎзА