8 минг 772 кўрик далолатномалари расмийлаштирилди.

Андижон вилоятида 37 минг 204 гектар экин майдони жорий йилнинг ўтган даврида Ўсимликлар карантини давлат инспекцияси агроном инспекторлари томонидан карантин кўригидан ўтказилди. 8 минг 772 кўрик далолатномалари расмийлаштирилди.

Мазкур жараёнда 635 та фермер хўжалиги ҳамда деҳқон томорқа ер эгаларига тегишли 489,6 гектар экин майдонларидаги зарарланиш ҳолатлари мутахассисларимиз томонидан бартараф этилди.

Жисмоний ва юридик шахслар тасарруфида бўлган экин майдонидаги зараркунанда ҳашоратлар, бегона ўтларнинг фитосанитар ҳолати тоза ҳудудларга тарқалишининг олдини олиш чора-тадбирлари белгиланиб, 555,9 гектар экин майдонидаги зарарланиш ҳолатлари кимёвий ишлов бериш, агротехник усуллар ёрдамида шу жойнинг ўзида бартараф қилинди.

Экин майдонларининг фитосанитар ҳолатига зарар етказиш билан боғлиқ қонун бузишлар юзасидан 19 нафар жисмоний ва юридик шахсларга нисбатан маъмурий баённома расмийлаштирилиб, маъмурий органларга тақдим этилди. Шундан 3 нафарига суд томонидан огоҳлантириш берилди, 8 нафарига жарима белгиланди, 5 нафарига чора кўриш масаласи пандемия сабабли вақтинча тўхтатилди.

Жорий йилнинг ўтган даврида помидор куяси, цитрос оқ қаноти, олма мевахўри, гилос пашшаси сингари 20 га яқин турдаги мева ва ўсимлик ҳашорати ҳамда зараркунандаларга қарши курашишга мўлжалланган 2 минг 248 дона феромон тутқичлар келтирилди. Ушбу жиҳозлар туманлар кесимида тарқатилиб, улардан самарали фойдаланиш назоратга олинди.

Туман агроном инспекторлари томонидан ҳудудларда етиштирилган қишлоқ хўжалиги махсулотларига 3 минг 471 та ички фитосанитар сертификатлар расмийлаштириб берилди. Шунингдек, ҳудудлардаги карантин манбаалари билан зарарланган майдонлар аниқланиб, зарарланиш ҳолатлари ва даражаси ҳақидаги маълумотлар “Ўздавкарантин” инспекциясига тақдим этилди. Ана шу маълумотлар асосида зарарланган ҳудудларда кимёвий агротехник кураш тадбирлари ўтказилиб, зарарланиш ҳолатлари бартараф этилди.

Андижон вилояти ўсимликлар карантини давлат инспекцияси томонидан ўсимликлар карантини, соҳага оид қонун ва қарорлар мазмун-моҳиятини мутахассислар, кенг жамоатчиликка етказиш борасида ҳам кенг кўламли тарғибот-тушунтириш ишлари олиб борилди. Фаолият юритаётган агроном инспекторлари фермер хўжаликлари, маҳалла фуқаролар йиғинларида аҳоли, кенг жамоатчилик иштирокида мунтазам равишда суҳбатлар ўтказмоқда. Жумладан, мутахассислар учун 400 дан зиёд ўқув семинарлари ташкил этилди. Бу нафақат мутахассисларнинг, балки кенг жамоатчиликнинг экин майдонлари ҳолатини соф сақлаш, турли зараркунанда ҳашоратларга қарши курашиш, мазкур йўналишда салбий ҳолатлар келиб чиқишининг олдини олиш борасидаги билим ва тушунчаларини юксалтиришга хизмат қилмоқда.

Жавоҳир ЭРГАШЕВ,

Андижон вилояти Ўсимликлар карантини

давлат инспекцияси бош агрономи