Мамлакатимизда ёшларга алоҳида эътибор қаратилиб, истеъдодларни кашф этиш ва уларни қўллаб-қувватлаш борасида тизимли ишлар амалга оширилмоқда.

Хусусан, Пискент тумани 79-сонли алоҳида таълим эҳтиёжларига эга болалар учун ихтисослаштирилган мактаб-интернати ана шундай эзгу мақсад йўлида фаолият юритмоқда. Бу ерда ўқувчиларнинг нафақат билим даражасини ошириш, балки уларнинг салоҳиятини рўёбга чиқариш учун ҳам кенг имкониятлар яратилган.

Мактаб-интернатда ҳозир тикувчилик, кулолчилик, дурадгорлик каби бир қатор тўгараклар фаолият кўрсатади. Уларнинг ҳар бирида болалар тажрибали устозлардан ҳунар сирларини ўрганишига, ижодий тафаккурини ривожлантиришга ҳаракат қилади. 

Владимир Василев 9-синфда таҳсил олмоқда. У кулолчиликка меҳр қўйган ёшлардан. Шу сабаб, бу соҳада ўз истеъдодини мунтазам равишда ривожлантириб келмоқда. Шу билан бирга боғдорчиликка ҳам қизиқади, табиат билан уйғун яшашни яхши кўради.

Жорий йилнинг 1-2 май кунлари республика миқёсида ўтказилган “Инсон учун” кўргазмасида Владимир ўзининг кулолчилик маҳсулотлари билан иштирок этиб, фахрли 1-ўринни қўлга киритди. Бу нафақат унинг шахсий ютуғи, балки мактаб жамоаси учун ҳам катта фахр бўлди.

– Владимир ўзининг фидойилиги, ижодкорлиги билан кўпчилик болаларга ўрнак. Унинг турли лойиҳаларда фаол иштироки бошқа ўқувчиларни ҳам илҳомлантиради. Умуман олганда, ҳар болада ўзига яраша иқтидорни кўраман. Уни шакллантириш ва оммага кўрсатишга ёрдам бериш бизнинг бурчимиз, – дейди мактаб-интернат директори Дилфуза Усмонова.

Айтиш жоиз, Пискент тумани 79-сонли алоҳида таълим эҳтиёжларига эга болалар учун ихтисослаштирилган мактаб-интернатда ҳозирда 260 нафар ўқувчи таълим олмоқда. Улардан 85 нафари қиз болалар. Шунингдек, 17 нафар болага якка тартибда, индивидуал ёндашув асосида таълим берилмоқда.

Владимирнинг эса тенгдошлари қатори орзулари улкан. У ижодга чанқоқ қалби билан келажакда ўз соҳасининг етук устаси бўлишни мақсад қилган.

А.Мусаев, ЎзА.