Ҳаммага маълум ва машҳур “YouTube” АҚШ Президенти Дональд Трамп билан суд жараёнини тўхтатиш учун 24,5 миллион доллар тўлашга рози бўлди. Трампнинг аккаунти 2021 йил 6 январь куни юз берган Капитолий босқинидан сўнг тўхтатилгач, миллиардер платформани сиёсий тарафкашликда айблаб, даъво аризаси берган эди.

Келишув шартига кўра, "Google" корпорациясининг бош компанияси - "Alphabet"  22 миллион долларни Оқ уй учун янги зал қуришни молиялаштираётган “Trust for the National Mall” жамғармасига ўтказади. Қолган 2,5 миллион даъвога қўшилган бошқа ташкилот ва шахслар, жумладан “American Conservative Union”га тўланади.

“YouTube” шу йил Трамп билан келишишга мажбур бўлган учинчи йирик платформа. Январда Мета (Facebook) 25 миллион, февралда Х (Twitter) 10 миллион доллардан Америка етакчиси фойдасига кечган.

Айни пайт Трампнинг барча ижтимоий тармоқ саҳифалари тикланган. Таҳлилчилар фикрича, бу жараён Силикон водийси ва Республикачилар партияси ўртасидаги муносабатда янги давр бошланганидан дарак бермоқда.

“YouTube” ҳам ўз навбатида платформадаги контент назоратини юмшатиб, илгари чекланган айрим аккаунтларни очишини маълум қилди. Компания Республикачилар назоратидаги Конгресс қўмитасига юборган мактубида, жумладан, шундай ёзган: "YouTube" консерватив танловни қадрлайди ва бу овозлар фуқаролик мулоқотида муҳим ўрин тутишини тан олади.

Мусулмон Зиё, ЎзА